दशैं अघिको एक महिनामै भित्रिए ५ हजारभन्दा बढी कार, उठ्यो पौने ८ अर्ब राजस्व

काठमाडौं–चालु आर्थिक वर्ष २०८३/८४ को तेस्रो महिना अर्थात् असोजमा मात्रै ५ हजारभन्दा बढी कार, जीप तथा भ्यान आयात भएका छन् ।

भन्सार विभागले सार्वजनिक गरेको पछिल्लो तथ्यांकअनुसार दशैं अघिको एक महिनामा कुल ५ हजार ५७ युनिट कार, जीप र भ्यान नेपाल भित्रिएका हुन् ।

नाईमा मोबिलिटी एक्स्पो र नाडा अटो शोमा बुकिङ गरेका ग्राहकलाई डेलिभरी दिनुका साथै दशैं र तिहारजस्ता ठूला चाडपर्वलाई लक्षित गरी यति ठूलो संख्यामा सवारी साधन आयात गरेका हुन् ।

असोज महिनामा कुल ९ अर्ब ४७ करोड रुपैयाँ बराबरका चारपाँग्रे यात्रुवाहक सवारी साधन भित्रिएका छन्, जसबाट सरकारले कुल ७ अर्ब ७३ करोड रुपैयाँ राजस्व संकलन गरेको छ । आयात भएका कुल सवारी साधनमध्ये विद्युतीय सवारी (ईभी) को वर्चस्व देखिएको छ ।

विभागका अनुसार असोजमा ३ हजार ८ सय २ युनिट ईभी, १ हजार ८३ युनिट पेट्रोल गाडी, ८४ युनिट डिजेल गाडी, ९ युनिट पेट्रोल हाइब्रिड र १३७ युनिट अन्य सवारी आयात भएका छन् ।

यसमध्ये ८ अर्ब ३५ करोड रुपैयाँ बराबरको विद्युतीय सवारी साधनबाट मात्रै सरकारले ४ अर्ब ८७ करोड रुपैयाँ राजस्व प्राप्त गरेको छ ।

त्यस्तै, ७९ करोड रुपैयाँ बराबरका पेट्रोल इन्जिन भएका गाडी र साढे १८ करोड रुपैयाँ बराबरका डिजेल गाडी आयात हुँदा डिजेल गाडीबाट मात्र राज्यले ५४ करोड राजस्व पाएको छ ।

यसका अतिरिक्त, ३ करोड ७८ लाख रुपैयाँ बराबरका ९ युनिट हाइब्रिड कार र ११ करोड ५९ लाख रुपैयाँ बराबरका १३७ युनिट अन्य सवारी साधन पनि सोही महिनामा भित्रिएका छन् ।