प्रतिबन्धका कारण अटो शो सर्न सक्ने नाडा अध्यक्ष थापाको भनाइ

अटोमोबाइल व्यवसायीहरुको छाता संगठन नाडा अटोमोबाइल्स एसोसिएसन अफ नेपालले भदौ ७ देखि आयोजना गर्ने तयारी थालेको अटो शो सर्न सक्ने देखिएको छ । सवारीसाधन आयातमाथिको प्रतिबन्ध कायमै रहेको समयमा अटो शो आयोजना गर्ने घोषणा गरेको नाडाले पहिलो चरणको प्रतिबन्ध हटेर आजदेखि आयात सुचारु हुने अपेक्षा राख्दै आएको थियो ।
तर सरकारले मोटरसाइकलको आयातमा थप कडाई गर्दै पहिलेको प्रतिबन्धलाई भदौ १४ सम्म लागु गर्ने निर्णय लिएपछि उक्त शो आयोजना हुने विषयमा संशय पैदा भएको हो । संघका अध्यक्ष ध्रुव थापाले पछिल्लो घटनाक्रमलाई अटो शोसँग जोडेर छलफल गरेछि उचित निर्णय लिइने बताए ।

उनले भने, ‘आजदेखि आयात खुल्नेमा हामी अटोमोबाइल व्यवसायी ढुक्क थियौं । उद्योग वाणिज्य मन्त्रिसँगको भेटमा पनि उहाँले साउन १ गतेबाट आयात खुल्छ भन्नुभएको थियो । तर अचानक मध्यराती राजपत्रमा सूचना प्रकाशन गरेर प्रतिबन्ध थपियो । यसले हामीलाई एकदमै अप्ठ्यारो स्थितिमा पुर्याइदिएको छ । सरकारको यो निर्णयले अटो शो तोकिएकै समयमा आयोजना गर्ने वा पछि सार्ने भन्ने विषयमा सोच्नुपर्ने अवस्था आएको छ । सवैजना व्यवसायीसँग सल्लाह गरेर यस विषयमा छिट्टै निर्णय लिनेछौ ।’

आयतमाथिको प्रतिबन्ध जारी रहेकै समयमा अटो शो गर्न नहुने व्यवसायीको समेत राय रहँदै आएको छ । प्रतिबन्ध जारी रहँदा नयाँ गाडी आयात गर्न समस्या हुने र पुरानै गाडी सोकेश गर्दा दर्शकको सहभागिता कम हुने कारण यस्तो समयमा अटो शो गर्नु उपलव्धिमूलक नहुने एक व्यवसायीले नेपाल अटोसँग बताए ।

अटो शो र लगत्तै सुरु हुने फेस्टिभल सिजनमा वर्षभरी बिक्री हुने कुल सवारीको झन्डै ४० प्रतिशत हाराहारी बिक्री हुँदै आएको अध्यक्ष थापाको भनाइ छ । ‘यो सिजन सवारी बिक्रीको प्रमुख सिजन पनि हो । राज्यले ठूलो रकम राजस्व संकलन गर्ने समय पनि हो । तर सुन र सुपारीलाई आवश्यक ठान्ने सरकारले गाडी र मोटरसाइललाई विलासी वर्गमा राखेर आयात रोकेको छ । यो भन्दा ठूलो विडम्बना अरु के हुनसक्छ । यसले आम नागरिकको मोबिलिटीमा असर त गर्छ नै राजस्व संकलन प्रभावित हुँदा देशको अर्थतन्त्रमै गम्भीर धक्का दिनेछ ।’ उनले भने ।

कोभिडका कारण यसअघिका २ वटा शो आयोजना गर्न नपाएको नाडामाथि यसपाली जसरी भएपनि फेस्टिभल सिजन अगावै अटो शो गर्नुपर्ने दवाव रहँदै आएको छ । अटो शो तोकिएकै समयमा आयोजना गर्ने तयारी अनुरुप उसले स्टल वुक समेत गराइसकेको छ ।