२०० सीसी भन्दा माथिका मोटरसाइकलको मूल्यमा भारी वृद्धि हुने, यस्तो छ बजेटको नयाँ व्यवस्था

काठमाडौं – सरकारले हिजो सार्वजनिक गरेको आर्थिक वर्ष २०७९/८० को बजेटले मोटरसाइकलको भन्सार र अन्तःशुल्कमा व्यापक वृद्धि गरेको छ । बजेटले २०० सीसी भन्दा कम क्षमताका मोटरसाइकलको करको दर यथावत राखे पनि त्यो भन्दा बढी क्षमताका मोटरसाइकलमा भने धेरै नै दर बढाएको छ ।

२०१ देखि २५० सीसीसम्मका मोटरसाइकलमा २० प्रतिशतले अन्तःशुल्क र १० प्रतिशतले भन्सार वृद्धि भए पश्चात अब यी मोटरसाइकलमा अन्तःशुल्क ८० प्रतिशत र भन्सार ४० प्रतिशत लाग्ने भएको छ ।

त्यसैगरी २५१ देखि ५०० सीसीको हकमा भन्सार ३० प्रतिशतबाट बढाएर ७० प्रतिशत र अन्तः शुल्क ८० बाट बढाएर ९० प्रतिशत बनाइएको छ।

५०१ सीसीदेखि बढी क्षमताका सबै मोटरसाइकलमा पहिले भन्सार ३० प्रतिशत रहेकोमा यसलाई बढाएर ८० प्रतिशत भन्सार बनाइएको छ। अन्तःशुल्क भने १०० नै यथवात राखिएको छ।

यसबाट २०० सीसी सम्मका मोटरसाइकलको करको दर यथावत रहे पनि त्यो भन्दा बढी क्षमताका मोटरसाइकलको मूल्यमा भने भारी वृद्धि हुने देखिएको छ ।