सडक मर्मतको क्षेत्रमा बजेट बढाइने, सडक सुरक्षाका लागि विभिन्न कार्य गरिने

काठमाडौं – आगामी आर्थिक वर्षमा सडक मर्मतको क्षेत्रमा बजेट बढाइने र करिव १६/१७ अर्ब बजेट यसका लागि छुट्याउने तयारी भएको भौतिक पूर्वाधार तथा यातायात मन्त्रालयका सचिव रविन्द्रनाथ श्रेष्ठले जानकारी दिए ।

छैटौं यूएन ग्लोबल रोड सेफ्टी विकको अवसरमा आज आयोजित ‘स्पिड म्यानेजमेनट एन्ड रोड सेफ्टी ल’ सम्बन्धी अन्तरक्रिया कार्यक्रममा सचिव श्रेष्ठले सो जानकारी दिएका हुन् ।

यूएन डिकेड अफ रोड सेफ्टी एक्सन प्लान (२०२१–२०३०) अनुसार हालको सडक दुर्घटनालाई आधा घटाउने लक्ष्य छ । यसका लागि हालको सडक सुरक्षा परिषदलाई अझै सक्रिय बनाउने र सरोकारवालाहरुसँग सरसल्लाह गरेर अगाडि बढ्ने समेत श्रेष्ठले बताए ।

सडक सुरक्षा सम्बन्धी विधेयक कानुन मन्त्रालयमा विचाराधिन रहेको र यसमा सडक सुरक्षा सम्बन्धी विभिन्न व्यवस्था गरिएको सचिव श्रेष्ठले बताए । उनका अनुसार यसमा सडक सुरक्षा कोषको व्यवस्था गरिने र यसमा विभिन्न प्रकारका जरिवाना, अनुदान र बिमा तथा संघ संस्थाबाट प्राप्त रकम जम्मा गरिने छ ।

सरकारले आगामी दिनमा पनि सुरक्षित सडकका लागि विभिन्न कार्य गर्नेछ । सचिव श्रेष्ठका अनुसार रोड सेफ्टी अडिट शुरु भइसकेको छ । त्यसैगरी ब्लाइन्ड स्पट स्टडी प्रारम्भ गरिएको छ भने सुरक्षित सडकका लागि ग्लास ब्यारियर, कंक्रिट ब्लक आदि राख्ने कार्य पनि भइरहेको छ ।

रोड सेफ्टी म्यानेजमेन्ट इन्फोर्मेसन सिस्टम राख्ने कार्यका लागि आवश्यक अध्ययन भइरहेको छ । सरकारले विश्व बैंकको सहयोगमा विभिन्न सार्वजनिक सवारी साधनहरुमा जीपीएस राख्ने कार्य पनि गरिरहेको छ ।

ग्लोबल एलायन्स फर एनजीओज फर रोड सेफ्टी, स्वतन्त्रता अभियान, नेपाल अटोमोबाइल्स एसोसिएसन (नासा) र नेसनल एलायन्स फर सेफ एन्ड सस्टेनेबल मोबिलिटीको आयोजनामा सो अन्तरक्रिया जुममार्फत गरिएको थियो ।

Streets for Life नाराका साथ छैटौं यूएन ग्लोबल रोड सेफ्टी विक मे १७ देखि २३ सम्म विश्वभर मनाइदै छ ।