ठूलो ब्याट्री प्याकसहित अपडेट भएर आउँदै एमजी विन्डसर

भारतिय बजारमा निकै राम्रो चर्चा पाइरहेको एमजीको विद्युतिय कार विन्डसर अपडेट भएर आउने भएको छ । विन्डसरमा एमजीले ठूलो ब्याट्री प्याक दिएर अपडेट गर्न लागेको हो । मिडिया रिपोर्ट अनुसार अर्को महिनाको सुरुमै यसको नयाँ संस्करण बजारमा उपलब्ध हुनेछ ।

विन्डसरको सो नयाँ संस्करणमा ५०.६ किलोवाट आवर क्षमताको ब्याट्री प्याक उपलब्ध हुने अनुमान गरिएको छ । ब्याट्री साइज बढेपछि यसले दिने रेन्जमा समेत सुधार आई हाल दाबी गरिएको ३३० किलोमिटरबाट बढेर ४६० किलोमिटर पुग्ने बताइएको छ । एमजीले अहिले ३८ किलोवाट आवरको ब्याट्री प्याकमा विन्डसर ईभी उपलब्ध गराउँदै आएको छ ।

ब्याट्री बाहेक यसको सेफ्टि फिचरमा समेत ब्यापक अपडेट गर्ने जेएसडब्लु एमजीले तयारी गरेको छ । नयाँ संस्करण्मा एडिएएस लगायत अन्य आधुनिक सेफ्टि फिचर उपलब्ध हुने अनुमान गरिएको छ भने इन्टेरियरमा समेत अपडेट हुनेछ ।

एमजी विन्डसर नेपाली बजारमा समेत प्रतिक्षा गरिएको ईभी हो । एमजीको नेपालका लागि आधिकारिक वितरक पारमाउन्ट मोटर्सले यस नयाँ ईभीलाई अवको केहिसमयपछि लन्च गर्ने तयारी गरेको छ ।