२ वर्षमा १३ नयाँ ईभी ल्याउने एमजीको घोषणा

एमजीले दुई वर्षमा विश्वव्यापी रूपमा १३ नयाँ ईभी लन्च गर्ने योजना बनाएको छ । यो खबर ब्रान्डका महाप्रबन्धक चेन कुईले सेयर गरेका हुन् । ‘यसमा विभिन्न प्रकारका ब्याट्री इलेक्ट्रिक भेइकल, रेन्ज एक्सटेन्डर र प्लग–इन हाइब्रिडहरू समावेश हुनेछन्’ उनले बताए ।

एसएआईसीको स्वामित्वमा रहेको एमजीले न्यू ईनर्जी भेइकल(एनईभी) को विकासमा १० अर्ब युआन (१.४ अर्ब अमेरिकी डलर) लगानी गर्ने योजना समेत बनाएको छ । नयाँ उत्पादन मूल्यमा मात्रै केन्द्रित नभई प्रबिधी र नवप्रवर्ततनको उत्कृष्ट नमुना हुने जनाइएको छ । जसका लागि कम्पनीले ओप्पो र सेमी–सोलिड स्टेट ब्याट्री टेकसँग सहकार्य अघि बढाइसकेको छ ।

एमजीका पेट्रोलबाट चल्ने कारहरूको चीनमा बलियो माग छ, तर ब्रान्डले सक्रिय रूपमा एनईभी साधनको विकासमा काम गर्ने योजना अघि सारेको छ । जसका लागी उसले आफ्नो प्यारेन्ट कम्पनी एसएआईसीकोे प्रविधि र आपूर्ति शृङ्खलाहरू प्रयोग गर्ने तयारी गरेको छ ।

विश्वव्यापी रूपमा अग्रणी चिनियाँ नयाँ ऊर्जा ब्रान्ड बन्ने लक्ष्य राखेको एमजीले आफ्नो लोककप्रिय ह्याचब्याक कार एमजी४ को नयाँ संस्करणलाई भोली २९ अगष्टमा लन्च गर्ने तयारी गरेको छ । जुन ब्रान्डको नयाँ रणनीतिसँग मिल्दोजुल्दो पहिलो उत्पादन हुने उल्लेख गरिएको छ ।