एमजी ईभीको बिक्री २०० प्रतिशत हाराहारीले बृद्धि, पुग्यो टाटा ईभीको नजिक

टाटा मोटर्स हाल भारतको अग्रणी इलेक्ट्रिक कार निर्माता हो । कम्पनीको पोर्टफोलियोमा धेरै लोकप्रिय इलेक्ट्रिक कारहरू छन् । यसमा टाटा नेक्सन ईभी, टाटा पंच ईभीलगायत धेरै मोडलहरू समावेश छन् ।

तर, पछिल्लो समय कम्पनीले भारतीय बजारमा कडा प्रतिस्पर्धाको सामना गरिरहेको छ । विशेष गरी जेएसडब्लु एमजी मोटरको बिक्री उच्च दरले बृद्धि हुँदा टाटा ईभीमाथी दबाद सिर्जना भएको हो । टाटा मोटर्सको बिक्रीमा ठूलो परिणामसहित निरन्तर गिरावट आइरहेको छ ।

टाटा मोटर्सले फेब्रुअरी २०२५ मा आफ्नो इलेक्ट्रिक प्यासेन्जर गाडीको खुद्रा बिक्रीमा उल्लेखनीय गिरावट देख्यो, जबकि एमजी मोटर इन्डियाले महिनामा अत्याधिक बृद्धि हाँसिल गर्न सफल भयो ।

टाटाले फेब्रुअरी २०२५ मा ३ हजार ८२५ यूनिट इलेक्ट्रिक कार बेचेको थियो, जुन गत वर्षको सोही महिनामा बेचेको ५ हजार १४३ यूनिटको तुलनामा २५.६३ प्रतिशतले कम हो । अटोमोबाइल डिलर्स एसोसिएसन (फाडा) को तथ्यांकबाट यो जानकारी प्राप्त भएको हो । टाटा मोटर्सले टियागो, टिगोर, पन्च, नेक्सन र कर्भ ईभीजस्ता विद्युतीय कारहरु उपलब्ध गराउँदै आएको छ ।

टाटा ईभीको बिक्री उच्च दरले घट्दा एमजीले भने आफ्नो बजार २०० प्रतिशत हाराहारीमा बृद्धि गरेको छ । फाडाका अनुसार एमजीको बिक्री गत वर्षको सोही महिनामा १ हजार ९६ यूनिटबाट फेब्रुअरी २०२५ मा १९८.३६ प्रतिशतले बृद्धि भएर ३ हजार २७० यूनिट पुगेको छ । एमजीसंग हाल कोमेट, विन्डसर र जेड ईभीमात्रै उपलब्ध छ ।