अपग्रेड भएर आउँदै जिली ईएक्स५, लिडार सेन्सर र थुप्रै नयाँ फिचर उपलब्ध हुने

काठमाडौं–जिली ईएक्स५ अपग्रेड भएर आउने भएको छ । कम्पनीले हालै यसको अपडेटेड संस्करणलाई चिनियाँ बजारमा बिक्री गर्न आवश्यक इजाजतपत्रका लागि दिएको निवेदनले कारमा धेरै फिचर अपग्रेड हुन लागेको खुलासा भएको हो ।

ईएक्स५ को नयाँ संस्करणमा लिडार सेन्सर र ११४ एचपी पावर थप हुने उल्लेख गरिएको छ । साथै, यस नयाँ संस्करणको डोर ह्यान्डलमा समेत परिवर्तन हुनेछ । हाल उपलब्ध लुकेको डोर ह्यान्डललाई परम्परागत ह्यान्डलले प्रतिस्थापन गर्ने जनाइएको छ ।

अपग्रेड गरिएको ईएक्स५ क्रसओभरमा थप आक्रामक बम्पर र एक्टिभ एयर इन्टेक उपलब्ध हुनेछ । नयाँ मोडलको छतमा लिडार सेन्सर राखिएको हुनेछ, जसले शहरी सडक र राजमार्गहरूमा नेभिगेट अन अटोपाइलट कार्य गर्न सक्षम जी–एएसडी जी–पाइलट एच५ असिस्टेड ड्राइभिङ सिस्टम सपोर्ट गर्दछ । नयाँ कारको अन्य हाइलाइटहरूमा अगाडिको फेन्डरहरूमा साइड क्यामेरा र रुफ स्पोइलरमा एकीकृत अतिरिक्त क्यामेरा समावेश हुनेछ ।

त्यसैगरी, सो नयाँ मोडलको चार्जिङ पोर्टलाई अगाडिको फेन्डरबाट पछाडि सारिनेछ । कार अव रियर ह्विल ड्राइभ सिस्टममा उपलब्ध हुने जनाइएको छ । नयाँ ईएक्स५ हालको भेरिएन्ट भन्दा २१ मिलिमिटर लामो हुनेछ भने एप्रोच र डिपार्चर एगंल क्रमशः १६ र २० डिग्री हुनेछ ।

जिली मोटर्सले नयाँ ईएक्स५ मा कुन साइजको ब्याट्री उपलब्ध गराउन खोजेको हो भन्नेबारे कुनै जानकारी बाहिर ल्याएको छैन । कारको अधिकतम गति १७५ किलोमिटरबाट बढेर २०१ किलोमिटर पुग्ने उल्लेख छ ।