लिपमोटरको अर्को कम्प्याक्ट ह्याचब्याक लाफा ५ : आईएए मोबिलिटी शोमा डेब्यु हुने

चाइनिज ईभी निर्माता कम्पनी लिपमोटरले आगामी दिनमा बजारमा ल्याउने नयाँ कम्प्याक्ट ईभीको टिजर सार्वजनिक गरेको छ । सो ईभीको नाम ‘लिपमोटर लाफा ५’ हुनेछ ।

अर्को साता अर्थात सेप्टेम्बर ९ देखि जर्मनीको म्युनिखमा सुरु हुने आईएए मोबिलिटी शोमा सो ईभी डेब्यु हुनेछ । युरोपेली बजारमा सो ईभीले फक्सवागन आईडी.३ सँग सिधा प्रतिस्पर्धा गर्नेछ ।

यो भन्दा पहिले ‘बी०५’ कोड नेमबाट परिचित सो ईभी लिप ३.५ मोड्युलर आर्किटेक्चरमा बनेको अनुमान गरिएको छ, जुनमा बी१० क्रसओभर समेत बनेको छ । लिपमोटर बी१० नेपाली बजारमा समेत उपलब्ध छ । यसमा लिपमोटरको प्रचलित डिजाइन ल्यांग्वेज र टच प्रयोग गरिएको छ ।

सो ईभीमा कर्भ्ड एलईडी हेडलाइट, रिट्रयाक्टेबल डोर ह्यान्डल, स्पोर्टी रुफ स्पोइलर र सिंगल टेललाइट युनिट लगायतका फिचर छन् । टिजर इमेज अनुसार यसको रुफमा लिडार सेन्सर समेत देखिन्छ । साना कारमा नपाइने सो फिचर उपलब्ध भयो भने यो धेरै नै महत्वपूर्ण हुनेछ ।

लिपमोटर लाफा ५ को अन्य फिचरको वारेमा थाहा पाउन भने केही समय कुर्नु नै पर्नेछ ।

लिपमोटरका ईभी नेपाली बजारमा समेत उपलब्ध छन् । सांग्रिला मोटर्सले नेपाली बजारमा लिपमोटरका ईभी बिक्री–वितरण गरिरहेको छ ।

नेपाली बजारमा पहिले टी०३ र सी१० उपलब्ध छन् । हालै बी१० को समेत बुकिङ भइरहेको छ । छिट्टै नै यसको डेलिभरी समेत हुने बताइएको छ ।