ईसीयू सफ्टवेयर अपडेट गर्न केटीएमले फिर्ता बोलायो ३९० ड्युक, एडभेन्चर र इन्ड्युराे बाइक

इन्जिन स्टलको समस्यालाई लिएर केटीएमले भारत सहित विश्वव्यापी रूपमा ३९० ड्युक, ३९० एडभेन्चर र ३९० इन्ड्युराे मोडल फिर्ता बोलाउने निर्णय गरेको छ ।

२०२४ देखि २०२६ मोडलका ३९० ड्युक बाइक र २०२५ देखि २०२६ मोडलका ३९० इन्ड्युराे आर, एसएमसी आर एडभेन्चर आर र इन्ड्युराे एक्स बाइकहरू कम आरपिएममा रोकिने समस्या देखिएपछि यसको उचित समाधानका लागि फिर्ता लिन लागिएको हो । यद्यपि, केटीएमले यो फिर्ता बोलाइबाट प्रभावित युनिटको सही संख्या भने सेयर गरेको छैन ।

यो समस्या समाधान केटीएमले गर्नेछ, जसले कम गतिमा वा गति घट्ने क्रममा रोकिने जोखिम कम गर्नेछ । साथै, उक्त समस्याको उचित समाधान पश्चात लो–इन्ड टर्कको कारणले गर्दा सवारी क्षमतामा पार्ने प्रभावलाई समेत सुधार गर्नेछ ।

प्रभावित मोटरसाइकलका मालिकहरूलाई फिर्ता बोलाउने बारेमा सूचित गरिने केटीएमले जनाएको छ । ग्राहकहरूले आफ्नो नजिकको अधिकृत केटीएम डिलरलाई सम्पर्क गरेर अपोइन्टमेन्ट तालिका बनाउन र ईसीयू सफ्टवेयर निःशुल्क अद्यावधिक गर्न सक्नेछन् ।