हुन्डाई क्रेटा, क्रेटा इलेक्ट्रिक र अल्काजारको लाउन्ज एडिसन सार्वजनिक

काठमाडौँ–हुन्डाईले आफ्ना लोकप्रिय मोडलहरू क्रेटा, क्रेटा इलेक्ट्रिक र अल्काजारको नयाँ ‘लाउन्ज एडिसन’ बजारमा सार्वजनिक गरेको छ ।

शीर्ष–स्पेसिफिकेसन ट्रिममा आधारित यी विशेष संस्करणहरू नयाँ गोल्डेन ब्रोन्ज रङ र उत्कृष्ट सुविधाहरूका साथ उपलब्ध गराइएको छ ।

गाडीको बाहिरी बनावटमा कालो रङको फ्रन्ट तथा रियर स्किड प्लेट, साइड सिल गार्निश, रियर स्पोइलर, रुफ रेल, ओआरभीएम र कालो ह्विल समावेश गरिएका छन्, जसले यसलाई प्रिमियम र आकर्षक लुक दिएको छ ।

गाडीको भित्री भागमा ११.६ इन्चको रियर सिट इन्टरटेनमेन्ट सिस्टम राखिएको छ, जसले ओटीटी सामग्री, गेम, भिडियो स्ट्रिमिङ र फोन मिररिङलाई सपोर्ट गर्छ । यो प्रणालीलाई गाडीमा पहिलेदेखि नै रहेको ८ स्पीकर बोस साउन्ड सिस्टमसँग जोडिएको छ ।

साथै, तीनै वटा मोडलमा लाउन्ज–एक्सक्लुसिभ इन्टेरियर, विशेष सिट डिजाइन प्याटर्न, लाउन्ज ब्रान्डिङसहितको पछाडिको सिट हेडरेस्ट कुशन र मुनव्हाइट एम्बियन्ट लाइटिङ जस्ता सुविधाहरू उपलब्ध छन् ।

इन्जिन र भेरियन्टको कुरा गर्दा, क्रेटा लाउन्ज एडिसन १.५ लिटर पेट्रोल आईभीटी र १.५ लिटर डिजेल अटोमेटिक भेरियन्टमा उपलब्ध गराइएको छ । त्यसैगरी, अल्काजार लाउन्ज एडिसन भने विशेष रूपमा ५ सीटर लेआउट र ६ स्पीड अटोमेटिक ट्रान्समिसनयुक्त १.५ लिटर डिजेल इन्जिनमा मात्र ल्याइएको छ ।

यी गाडीहरूको मूल्य क्रेटाका लागि १९.२१ लाख, अल्काजारका लागि २१.८० लाख र क्रेटा इलेक्ट्रिकका लागि २४.३४ लाख भारुबाट सुरु हुने जनाइएको छ ।