नेपालमा बिक्री हुन्छन् २३ लाख ५० हजार रुपैयाँ सम्मका होन्डा बाइक, यस्तो छ मूल्य सूची

काठमाडौं – नेपाली बजारमा होन्डाको आधिकारिक वितरकको रुपमा स्याकार ट्रेडिङ कम्पनीले कार्य गरिरहेको छ । हाल नेपाली बजारमा होन्डाका १४ मोडलका मोटरसाइकल र स्कुटर बिक्री हुन्छन् ।

होन्डाले नेपाली बजारमा बिक्री गर्ने दुई पांग्रे सवारी साधनमा सबैभन्दा कम मूल्यको मोडल ११० सीसीको डियो स्कुटर हो । स्ट्यान्डर्ड र डिलक्स गरी यो स्कुटर दुई भेरिएन्टमा उपलब्ध छ । यसको मूल्य क्रमशः २ लाख ५९ हजार ९ सय र २ लाख ६९ हजार ९ सय रुपैयाँ छ ।

डियो १२५ सीसी मोडलमा समेत उपलब्ध छ । यो पनि स्ट्यान्डर्ड र स्मार्ट गरी दुई भेरिएन्टमा उपलब्ध छ । बीएस६ मापदण्डयुक्त डियो १२५ को मूल्य क्रमशः ३ लाख ३ हजार ९ सय र ३ लाख २३ हजार ९ सय रुपैयाँ छ ।

नेपाली बजारमा उपलब्ध होन्डाका मोटरसाइकल मध्ये सीबी र साइन मोडल धेरैले मन पराएका छन् । त्यसैगरी बिग बाइकमा सीबी हर्नेट, एनएक्स, एक्सआर, सीबी लगायतका मोडल लोकप्रिय छन् । करिव १० लाख भन्दा कम मूल्यमै उपलब्ध हुने यस्ता बाइक युवाहरुका लागि रुचिकर बनेका छन् ।

होन्डाले नेपाली बजारमा दुई मोडलका सीआरएफ बाइक समेत उपलब्ध गराउछ । यी दुई मोडलको मूल्य क्रमशः २० लाख ७५ हजार र २३ लाख ५० हजार रुपैयाँ तोकिएको छ ।

थाइल्यान्डबाट आयात गरिने यी बाइक भने ग्राहकको माग बमोजिम मात्र बिक्रीका लागि उपलब्ध हुन्छ ।

होन्डाका अन्य मोडल मध्ये सबै मोडल भारतमा उत्पादन हुन्छन् भने एक्सआर मोडल भने चीनमा उत्पादन हुन्छ ।