हिरोको अन्तर्राष्ट्रिय बजार ४३ प्रतिशतले बढ्यो, युरोपमा बजार विस्तार हुँदै

विश्वको सबैभन्दा ठूलो टु–ह्विलर अटो उत्पादक हिरो मोटोकर्पले आफ्नो बजार युरोपेमा समेत विस्तार गर्ने भएको छ । हिरो मोटोकर्पले अर्को वर्ष युरोप हुँदै आफ्नो विश्वव्यापी उपस्थिति विस्तार गर्ने योजना बनाएको हो ।

बाइक निर्माताले आर्थिक वर्ष २०२६ को दोस्रो त्रैमासिकमा जर्मनी, फ्रान्स, स्पेन र बेलायतमा मोटरसाइकल र स्कुटर बिक्री सुरु गर्ने तयारी गरेको छ ।

हिरो मोटोकर्पका अध्यक्ष पवन मुन्जालका अनुसार बाइक निर्माताले युरोप लगायत अन्य बजारमा आफ्नो उपस्थिती मजवुत बनाउन लगानी थप्ने रणनिती बनाएको छ । ‘हिरो फर स्टार्टअप्स’ पहल सहित आफ्नै प्लेटफर्महरू मार्फत, कम्पनीले अर्को पुस्ताका उद्यमीहरूलाई मार्गदर्शन गरिरहेको छ’ कम्पनीको आर्थिक वर्ष २०२५ को वार्षिक प्रतिवेदनमा उनले भनेका छन् ।

आर्थिक वर्ष २०२४/२५ मा, हिरो मोटोकर्पले दक्षिण एसिया र ल्याटिन अमेरिकामा बलियो उपस्थिती जनाउँदै अन्तर्राष्ट्रिय बजारमा ४३ प्रतिशत वार्षिक वृद्धि हाँसिल गरेको थियो ।

हिरोको इलेक्ट्रिक सब–ब्रान्ड भिडाले पनि बिक्रीमा उच्च बृद्धि हाँसिल गरिरहेको छ । भिडाको बिक्री अघिल्लो आर्थिक वर्षको तुलनामा गत वर्ष २०० प्रतिशतले बृद्धि भएको कम्पनीको भनाई छ ।