१२५ सिसी सेग्मेन्टमा निरन्तर बजार गुमाउँदै हिरो, पल्सर १२५ ले पनि उछिन्यो

१२५ सिसी सेग्मेन्टमा सर्बाधिक बिक्री हुने मोटरसाइकलको पहिचान बनाएको हिरोले पछिल्लो समय यो सेग्मेन्टमा आफ्नो हिस्सा गुमाउँदै गएको छ । केही वर्षअघि सम्म हिरोको कुल बिक्रीमा सुपर स्प्लेन्डर र ग्ल्यामर मोटरसाइकलको योगदान निकै उच्च थियो । तर विगत केही समययता भारतमा हिरोको उक्त बर्चश्वलाई होन्डा साइनले तोडेपछि यो सेग्मेन्टमा हिरो दोस्रो स्थानमा रहँदै आएको थियो ।

पछिल्लो समय हिरोले हाँसिल गरेको उक्त स्थानलाई बजाज पल्सर १२५ ले उछिनेको छ भने टीभीएस रेडरको बिक्रीमा आएको उल्लेख्य सुधारका कारण उसको स्थान अझै खस्किने पक्कापक्कि जस्तै छ । भारतमा अप्रिलदेखी सेप्टेम्वरसम्म बिक्री भएको यो सेग्मेन्टको बिक्री दरलाई आधार मान्दा हिरोको स्थान छिट्टै टिभीएस रेडरले लिने देखिएको हो ।

यो वर्षको ६ महिनामा होन्डाले ६ लाख ५ हजार बढी साईन मोटरसाइकल बिक्री गर्दा बजाजले ४ लाख १७ हजार बढी पल्सर १२५ बिक्री गरेको छ । यसैगरी तेस्रो स्थानमा झरेको हिरोले सुपर स्प्लेन्डर र ग्ल्यामर गरी कुल ३ लाख १७ हजार युनिट मात्र मोटरसाइकल बिक्री गरेको छ । उसलाई पछ्याउँदै गएको टिभिएसले सो अवधिमा कुल २ लाख २८ हजार रेडर बिक्री गर्न सफल भएको छ ।

गत बर्षको सोही अवधीको तुलनमा बिक्री कम भएपनि फराकिलो अन्तरका साथ होन्डा यो सेग्मेन्टमा पहिलो वनेको छ । होन्डाले गत बर्षको सोही अवधीमा ७ लाख ३१ हजार साइन बिक्री गरेको थियो । यसैगरी गत बर्ष ३ लाख ४४ हजार पल्सर १२५ बिक्री गरेको बजाजको बिक्रीमा सुधार आउँदा ३ लाख ५४ हजार सुपर स्प्लेन्डर र ग्ल्यामर बिक्री गरेको हिरो तेस्रो स्थानमा झरेको हो ।

गतबर्षको सोही अवधीमा जम्मा ७३ हजार ५०० युनिट मात्र रेडर बिक्री गरेको टीभीएसले भने यसवर्षको ६ महिनामा तीन गुना बढीले बिक्री बढाएको छ ।