हिरोले दुई नयाँ सस्तो इलेक्ट्रिक स्कुटर ल्याउँदै, जुलाईमा लन्च हुने

हिरो मोटोकर्पले जुलाई २०२५ मा दुई नयाँ किफायती इलेक्ट्रिक स्कुटर लन्च गर्ने तयारी गरिरहेको छ। कम्पनीले हालैको सम्मेलन कलमा आगामी योजनाबारे जानकारी दिँदै नयाँ इलेक्ट्रिक दुई पाङ्ग्रे सवारी साधन बजारमा ल्याउने जानकारी दिएको छ ।

हिरो मोटोकर्पले आर्थिक वर्ष २०२४–२५ मा भारतीय बजारमा ५६ लाखभन्दा बढी सवारी साधन बिक्री गरेको छ। कम्पनीको इलेक्ट्रिक सवारी साधन पोर्टफोलियोमा हाल भिडा भी२ सिरिजका स्कुटर समावेश छ । यद्यपि यी स्कुटर रेन्जको हिसाबले टीभीएस आईक्युब, बजाज चेतक र ओला एस१ जस्ता मोडल भन्दा पछाडि छ ।

गत आर्थिक वर्षमा हिरोले भिडा रेन्जका ५८ हजार ५०३ युनिट इलेक्ट्रिक स्कुटर बिक्री गरेको थियो, जुन अघिल्लो वर्षको तुलनामा १९५ प्रतिशतले वृद्धि हो। यस बिक्री वृद्धिको आधारमा कम्पनीले अब अझ सस्तो इलेक्ट्रिक स्कुटर ल्याउने योजना बनाएको हो।

नयाँ स्कुटर विशेष गरी ग्रामीण क्षेत्रका उपभोक्तालाई ध्यानमा राखेर तयार पारिने छ । ग्रामीण बजारमा हिरो ब्रान्डको बलियो उपस्थिति रहेकाले कम्पनीको यो रणनीति सफल हुन सक्ने अपेक्षा गरिएको छ।

हाल उपलब्ध भिडा स्कुटरको मूल्य ७४ हजारदेखि १ लाख १५ हजार भारतीय रुपैयाँको बीचमा रहेको छ। नयाँ स्कुटरमा हालै भारतीय सडकमा परीक्षण भइरहेको भिडा जेड पनि समावेश हुन सक्ने अनुमान गरिएको छ।

हिरो मोटोकर्पको सो नयाँ इलेक्ट्रिक मोटरसाइकलले बजारमा थप प्रतिस्पर्धा ल्याउने विश्वास गरिएको छ। साथै, किफायती मूल्य र ग्रामीण बजार लक्षित रणनीतिले यसलाई सफल बनाउने अपेक्षा गरिएको छ।