हिरोको ब्रान्ड एम्बेसडरमा दयाहाङ, सुरक्षा र सुशान्त

काठमाडौं – नेपालका लागि हिरो मोटोकर्पको आधिकारिक वितरक सीजी मोटर्सले दयाहाङ राई, सुरक्षा पन्त र सुशान्त केसीलाई ब्रान्ड एम्बेसडर नियुक्त गरेको छ ।

चौधरी ग्रुुपका प्रबन्ध निर्देशक निर्वाण चौधरी र हिरो मोटोकर्प नेपालले सामाजिक सञ्जालमार्फत सो जानकारी सार्वजनिक गरेका छन् ।

विशेष गरी नेपाली चलचित्र क्षेत्रमा लोकप्रिय मानिएका यी व्यक्तित्वहरुलाई नयाँ ब्रान्ड एम्बेसडरको रुपमा हिरो फेमिलीमा स्वागत गरिएको बताइएको छ ।

पछिल्लो समयमा नेपाली अटोमोबाइल क्षेत्रमा ब्रान्ड एम्बेसडर राख्ने प्रचलन बढ्दै गएको छ । विशेष गरी विभिन्न क्षेत्रमा प्रतिष्ठित कहलिएका व्यक्तित्वहरुलाई ब्रान्ड एम्बेसडर राख्ने चलन छ ।

हिरो मोटोकर्प केही समय पहिले मात्र चौधरी ग्रुप अन्तर्गतको सीजी मोटर्सले बिक्री–वितरण गर्न थालेको हो । यो भन्दा पहिले ज्योति ग्रुप अन्तर्गतको एनजीएमले यसको बिक्री–वितरण गर्ने गरेको थियो ।

हाल सीजी मोटर्सले नेपाली बजारमा सुपर स्प्लेन्डर, स्प्लेन्डर प्लस, एक्सपल्स २०० फोरभी र नयाँ स्कुटर जुम बिक्री–वितरण गरिरहेको छ । नवलपरासीस्थित एसेम्बल प्लान्टमा यी मोटरसाइकल र स्कुटर एसेम्बल हुने गरेका छन् ।