पुरै विन्डशिल्डलाई फुल–डिस्प्ले स्क्रिनको रुपमा विकास गर्दै हुन्डाई

हुन्डाई मोटर ग्रुपको सहायक कम्पनी हुन्डाई मोबिसले जर्मन अप्टिकल जायन्ट जेइससँग ‘होलोग्राफिक विन्डशिल्ड डिस्प्ले’ विकास गर्नका लागि साझेदारी गरेको छ । दक्षिण कोरियाली कम्पनी हुन्डाईले यस प्रकारको प्रविधिले हाल कारमा उपलब्ध हुने ड्यासबोर्डको स्क्रिन सबै हटाउने र यसको पुरै विन्डशिल्ड नै फुल–डिस्प्ले स्क्रिन हुने बताएको छ ।

दुवै कम्पनीले पुरै हेड–अप डिस्प्ले (एचयूडी) को आइडिया लिएर त्यसैको विस्तृत रुपलाई पुरै फ्रन्ट विन्डशिल्डको रुपमा विकास गरेको बताएका छन् । यद्यपि हालको एचयूडीमा स्पिड र नेभिगेसनको लगायतका केही सूचना मात्र उपलब्ध हुन्छ भने नयाँ सिस्टममा भने इन्फोटेनमेन्ट, अडियो कन्ट्रोल, भिडियो, भेइकल मेनु र गेम लगायतका विभिन्न फिचरहरु सम्मिलित हुनेछन् ।

सार्वजनिक भएको कन्सेप्ट इमेज चाहिं किया ईभी९ जस्तो देखिन्छ । यसको ड्यासबोर्डमा इन्स्ट्रयुमेन्ट कन्सोल र सेन्ट्रल टचस्क्रिन दुवै छ भने यसमा पुरै विन्डशिल्डमा विभिन्न जानकारी उपलब्ध हुन्छ ।

यसले कसरी कार्य गर्दछ भन्ने वारेमा पनि मोबिस र जेइस दुवैले जानकारी दिएका छन् । यसमा होलोग्राम डिस्प्ले गर्ने अल्ट्रा–थिन फिल्म हुन्छ भने ड्यासबोर्डमा कतै प्रोजेक्टर माउन्ट गरिन्छ । यो पारदर्शी हुनुका साथै यसले कुनै पनि अवरोध गर्दैन ।

ड्राइभर र यात्रु दुवैले अगाडिको दृश्य सहज तरिकाले हेर्न सक्छन् । यसको स्क्रिनलाई भ्वाइस वा जेस्चर कन्ट्रोलबाट संचालन गर्न सकिने छ ।