लन्डन डिजाइन अवार्डमा ओरा५ लाई ‘डिजाइन अफ द इयर’ उपाधि, नेपालमा पनि देखियो क्रेज

काठमाडौँ–नेपालमा सार्वजनिक भएको एक सातामै बजारमा बलियो छाप छोड्न सफल जीडब्लूएमको नयाँ विद्युतीय एसयूभी ओरा५ ले अन्तर्राष्ट्रिय मञ्चमा ठुलो सफलता हासिल गरेको छ ।

ओरा५ ले प्रतिष्ठित २०२५ लन्डन डिजाइन अवार्ड अन्तर्गत प्रोडक्ट डिजाइन (अटोमोबाइल्स/भेहिकल्स) विधामा ‘डिजाइन अफ द इयर’ को उपाधि जितेको हो ।

यस सम्मानले ओरा५ को आकर्षक बाह्य बनावट मात्र नभई, जीडब्लूएमको अत्याधुनिक प्रविधि, प्रयोगकर्ता–केन्द्रित सोच र स्मार्ट गतिशीलताप्रतिको दृष्टिकोणलाई समेत विश्वस्तरमा स्थापित गरेको छ ।

‘प्रकृतिबाट प्रेरित, सहरका लागि निर्मित’ भन्ने मूल सोचका साथ तयार पारिएको ओरा५ को डिजाइन जैविक प्रेरणामा आधारित छ । यसमा आकर्षक वक्राकार संरचना र पानीको थोपा शैलीका अगाडिका बत्ती जडान गरिएका छन्, जसले आधुनिक सौन्दर्य र प्रविधिको उत्कृष्ट संयोजन प्रस्तुत गर्दछ ।

एकपटकको पूर्ण चार्जमा ५२० किलोमिटरसम्मको रेन्ज प्रदान गर्ने ओरा५ मा नेपाली सडकलाई सुहाउँदो २०० मिलिमिटरको उत्कृष्ट ग्राउन्ड क्लियरेन्स दिइएको छ ।

कारमा कफी पाइलट अल्ट्रा इन्टेलिजेन्ट ड्राइभिङ प्रणाली र कफी ओएस३ स्मार्ट ककपिट पाउन सकिन्छ । २० भन्दा बढी उन्नत चालक सहायता प्रणाली (एडास), ३६० डिग्री क्यामेरा र १८० डिग्री च्यासिस दृश्य क्यामेरा, सेल्फ–हिलिङ पेन्ट, प्यानोरामिक मुनरुफ र प्रिमियम इन्टेरियर यसका प्रमुख विशेषता हुन् ।

सुरक्षालाई उच्च प्राथमिकता दिँदै ओरा५ मा उच्च स्ट्रेन्थ स्टिल संरचना र ७ वटा एयरब्याग राखिएका छन् । यस मोडेलले अन्तर्राष्ट्रिय स्तरका कडा सुरक्षा मूल्याङ्कनहरु एएनक्याप यूरो एनक्याप दुवैमा फाइभ–स्टार रेटिङ प्राप्त गरेको छ ।

नेपाली बजारमा आकर्षण र मूल्य
नेपाली अटोमोबाइल बजार र सामाजिक सञ्जालमा व्यापक चर्चा बटुलिरहेको यस प्रिमियम ईभीको प्रारम्भिक मूल्य ४६ लाख ९९ हजार रुपैयाँ निर्धारण गरिएको छ । ग्राहक, अटो पारखी तथा उद्योगीहरूबाट प्राप्त सकारात्मक प्रतिक्रियाले यसलाई नेपालको बहुप्रतीक्षित मोडेलका रूपमा स्थापित गरेको जीडब्लूएमको नेपालका लागि आधिकारिक वितरक भीजी इम्पेक्सको भनाई छ ।

कम्पनीले निकट भविष्यमै हाभल जोलियन म्याक्स ईभी र हाभल एच७ समेत नेपाली बजारमा सार्वजनिक गर्ने तयारी गरेको छ । यी नयाँ मोडेलहरूको आगमनसँगै जीडब्लूएमले नेपालमा आफ्नो विद्युतीय तथा स्मार्ट एसयूभी पोर्टफोलियोलाई अझ सशक्त बनाउने विश्वास लिएको छ ।