एआई असफल भएपछि फोर्डले फर्कायो ३५० अनुभवी इन्जिनियर

विश्वभर एआईको प्रयोग तीव्र रूपमा बढिरहेका बेला अमेरिकी अटोमोबाइल निर्माता फोर्डले भने मानव अनुभवको महत्त्वलाई स्वीकार गरेको छ। कम्पनीले आफ्ना पुराना ३५० जना इन्जिनियरलाई पुनः काममा फर्काएको छ।

फोर्डले पहिला आफ्नो सम्पूर्ण औद्योगिक सिस्टममा एआई विस्तार गर्ने रणनीति अघि बढाएको थियो। कम्पनीका प्रमुख सञ्चालन अधिकृत कुमार गल्होत्राले उत्पादन प्रक्रियाभर एआईको प्रयोग भइरहेको बताएका थिए। यही योजनाअन्तर्गत फोर्डले आफ्ना उत्पादन प्लान्टमा करिब ९०० वटा एआईद्वारा सञ्चालित क्यामेरा जडान गरेको थियो। ती क्यामेराहरू उत्पादनमा देखिने गुणस्तरसम्बन्धी समस्या प्रारम्भिक चरणमै पहिचान गर्न तथा आपूर्ति शृङ्खलामा आउने अवरोध कम गर्न प्रयोग गरिएका थिए।

साथै कम्पनीले आफ्नो लागत घटाउने र उत्पादन क्षमता बढाउने उद्देश्यले आफ्नो अटोमेटेड क्वालिटी कन्ट्रोल सिस्टममा एआईको व्यापक प्रयोग सुरु गरेको थियो। तर व्यवहारमा सो सिस्टमले अनुभवी इन्जिनियरको ज्ञान, अनुभव र परिस्थितिअनुसार निर्णय गर्ने क्षमताको बराबरी गर्न नसकेकाले आफ्ना पूर्व इन्जिनियरलाई पुनः नियुक्त गर्ने निर्णय लिएको हो।

फोर्डको सो निर्णयले एआई जति विकसित भए पनि अनुभव, सीप र व्यावहारिक निर्णय क्षमताले अझै पनि औद्योगिक उत्पादनको गुणस्तरमा महत्वपूर्ण भूमिका खेल्ने तथ्यलाई पुनः उजागर गरेको छ। साथै, एआईलाई मानवको पूर्ण विकल्पका रूपमा होइन, अनुभवी जनशक्तिलाई सहयोग गर्ने प्रविधिका रूपमा प्रयोग गर्दा मात्र उत्कृष्ट नतिजा प्राप्त हुन सक्ने सन्देश पनि दिएको छ।

यता अर्को अमेरिकी अटोमोबाइल कम्पनी जनरल मोटर्स भने अटोमेशन र कर्मचारी कटौतीका कारण विवादमा परेको छ। कम्पनीले आफ्नो मुख्य डेट्रोइट एसेम्बली प्लान्टबाट १ हजारभन्दा बढी कर्मचारी हटाएको छ भने करिब ५० वटा नयाँ रोबोटिक युनिट सञ्चालनमा ल्याएको छ।

यद्यपि जनरल मोटर्सले बजारमा प्रतिस्पर्धात्मक क्षमता कायम राख्न, उत्पादन प्रक्रियामा लचिलोपन बढाउन र आधुनिक प्रविधिको प्रयोग विस्तार गर्न रोबोटको प्रयोग आवश्यक भएको जनाएको छ। कम्पनीका प्रवक्ता केभिन केलीका अनुसार उत्पादन केन्द्रमा सहयोगी रोबोट स्थापना गर्ने कार्य व्यापक प्रविधि आधुनिकीकरण योजनाको हिस्सा हो। उनका अनुसार यी रोबोटहरू कारखानामा कार्यरत कर्मचारीसँग सहकार्य गर्दै काम गर्नेछ र कामदारको सुरक्षा तथा कार्यस्थलको सहजता अझ प्रभावकारी बनाउने उद्देश्य राखेको छ।