यस्तो छ मोटरसाइकलमा पछाडिको सिट अग्लो बनाउनुको कारण

अधिकांश मोटरसाइकलमा फ्रन्ट सिटभन्दा पछाडिको सिट केही अग्लो हुन्छ। तर यस्तो डिजाइन किन गरिन्छ? के यसले मोटरसाइकलको सन्तुलन, सुरक्षा र यात्राको आराममा कुनै भूमिका खेल्छ? यसको पछाडि मोटरसाइकलको बनावट, बस्ने अवस्था र समग्र डिजाइनसँग सम्बन्धित विभिन्न कारण हुन्छ ।

मोटरसाइकल दैनिक आवतजावतको लागि र लामो दूरीको यात्रा गर्नसमेत मोटरसाइकल प्रयोग गरिन्छ। यस्तो अवस्थामा चालकसँगै पछाडि बस्ने यात्रुको सुविधालाई पनि ध्यानमा राखेर मोटरसाइकलको सिट डिजाइन गरिएको हुन्छ। मोटरसाइकलमा पछाडिको सिट अग्लो हुनुको एउटा प्रमुख कारण चालक र पछाडि बस्ने यात्रुको बस्ने अवस्थालाई सहज बनाउनु हो।

चालकले ह्यान्डल, ब्रेक र गियर कन्ट्रोल गर्नुपर्ने भएकाले उसको बस्ने स्थान र शरीरको झुकाइ विशेष रूपमा निर्धारण गरिन्छ। पछाडि बस्ने यात्रुको आवश्यकता भने फरक हुन्छ। त्यसैले दुवै सिटको उचाइ, आकार र बनावट एउटै नहुन सक्छ। अर्को महत्त्वपूर्ण कारण चालकको भिजिविलिटिसँग सम्बन्धित छ। पछाडि बस्ने यात्रु चालकभन्दा केही माथि बस्दा कतिपय अवस्थामा अगाडितर्फ हेर्न सजिलो हुन्छ। त्यस्तै, मोटरसाइकलको बनावटलाई आकर्षक र सन्तुलित देखाउन पनि अगाडि र पछाडिको सिट फरक उचाइमा राखिएको हुन्छ ।

यद्यपि, सबै मोटरसाइकलमा यही व्यवस्था हुन्छ भन्ने छैन। सिटको उचाइ कम्पनी, मोडल र मोटरसाइकलको प्रकारअनुसार फरक हुन्छ।सिटको उचाइ र मोटरसाइकलको सन्तुलनबीच पनि सम्बन्ध हुन्छ, तर पछाडिको सिट अग्लो बनाउँदैमा मोटरसाइकल बढी सन्तुलित हुन्छ भन्ने होइन।

मोटरसाइकलमा दुई जना बस्दा उनीहरूको कुल तौल, तौलको वितरण, गुरुत्वकेन्द्र, ह्विलबेस र सस्पेन्सनको अवस्थाले सन्तुलनमा प्रभाव पार्छ। पछाडि बस्ने यात्रुको तौल कहाँ र कसरी पर्छ भन्ने कुरा सिटको उचाइभन्दा पनि महत्त्वपूर्ण हुन सक्छ। त्यसैगरी, पछाडिको सिट अग्लो हुँदैमा यात्रु बढी आरामदायी हुन्छन् भन्ने पनि छैन। आराम मुख्यतया सिटको आकार, फोमको गुणस्तर, बस्ने ठाउँ, खुट्टा राख्ने स्थान र मोटरसाइकलको सस्पेन्सनमा निर्भर हुन्छ।

पछाडिको सिटको उचाइले हावा लाग्ने अवस्था र यात्रुको भिजिविलिटीमा पनि केही प्रभाव पार्न सक्छ। तर अग्लो सिट भएकै कारण हावा वा धुलो कम लाग्छ भन्ने निश्चित हुँदैन। यसमा मोटरसाइकलको बडी डिजाइन, विन्डस्क्रिन, चालकको उचाइ र यात्रुको बस्ने अवस्थाले पनि भूमिका खेल्छ।