टुरिस्ट बस प्रयोग गर्ने नेपाली बढ्दै, यस्ता छन् टुरिस्ट बस चढ्दा हुने ५ फाइदा

नेपालमा अहिले टुरिष्ट बसको प्रयोग बढ्दो छ । विशेष गरी अन्तर्राष्ट्रिय पर्यटकलाई केन्द्रित गरेर यस्ता बस उपलब्ध गराउने गरिएको भए पनि पछिल्लो समयमा नेपाली पर्यटक समेत यस्ता बसमा धेरै चढ्ने गरेका छन् ।

काठमाडौंदेखि पोखरा, चितवन, लुम्बिनी, जनकपुर आदि स्थानमा यस्ता बस चल्छन् भने उपत्यका वाहिरबाट पनि अन्य स्थानमा यस्ता बस चल्ने गरेका छन् ।

विभिन्न टुर एन्ड ट्राभल एजेन्सीहरुले आफ्ना बस सेवा समेत सञ्चालन गरेका छन् । यी बस सञ्चालकहरु मध्ये कमसेकम दुई बस सञ्चालकहरु नेपाल टुरिस्ट बस एसोसिएसनमा आवद्ध छन् । नयाँ गाडी भएको अवस्थामा मात्र एसोसिएसनमा आवद्ध हुन पाइने नियम छ । हाल नेपालभर यस्ता करिव अढाई सय बस सञ्चालनमा रहेको एसोसिएसनका निवर्तमान अध्यक्ष कृष्ण आचार्यले बताए ।

कुनै समयमा अगाडि चुच्चो निस्किएको मर्सिडिज बस चढ्दै नेपाल आएका पर्यटकले छोडेको बसबाट टुरिस्ट बसको सुरुवात भएको थियो । स्विस ट्राभल्सले सो बस संचालनमा ल्याएको थियो । पहिले रातो प्लेटमै चलिरहेकोमा पछि यस्ता बसलाई अलग्गै पहिचान दिनुपर्छ भन्ने उद्देश्यका साथ हरियो प्लेट राखेर चलाउन थालिएको थियो ।

कुनै समयमा दुई बस मात्र चल्ने चितवनमा अहिले १२ बस चल्छन् । पोखरामा पहिले करिव ८ बस चल्ने गरेकोमा अहिले करिव २५ बस चल्छन् । पहिले जेठ महिना पश्चात सेवा नै बन्द गर्नुपर्ने सौराहामा अहिले सधै सेवा पाइन्छ । यसमा आन्तरिक पर्यटकको विशेष भूमिका छ ।

यसरी आन्तरिक पर्यटकले समेत टुरिस्ट बसको प्रयोग गर्नुमा यसमा पाइने सेवा र सुविधाको विशेष भूमिका छ । सामान्यतः टुरिस्ट बस प्रयोग गर्दा पाइने ५ फाइदालाई यसरी उल्लेख गर्न सकिन्छ ।

सुविधा र फिचर
टुरिस्ट बस अन्य सामान्य बस भन्दा सुविधा र फिचरको दृष्टिकोणले समेत फरक छन् । यस्ता बसलाई तीन क्याटागोरीमा विभाजन गर्न सकिने आचार्यको भनाइ छ ।

प्रिमियम सोफा, टु बाई टु एसी र कोस्टर गरी तीन प्रकारका बस सञ्चालनमा रहेका छन् । स्ट्यान्डर्ड मेन्टेन गर्नकै लागि ४० सिटे बसलाई २८ सिटमा घटाएर समेत त्यही अनुसार सुविधायुक्त बनाइएको व्यवसायीहरुको भनाइ छ । प्लेनमा पाइने बिजनेस क्लास जस्तो सुविधा बसमा समेत उपलब्ध हुन्छ ।

बटम दबाए पछि आफ्नै अगाडि पछाडि हुने रिक्लाइनिङ सिट, बाहिरको मनोरम दृश्य हेर्न सकिने व्यवस्था, फराकिलो क्षेत्र लगायतका विशेषता र यात्रुहरुलाई चालक तथा सहचालकको मिजासपूर्ण व्यवहारका कारण यी बसमा चढ्न धेरैले रुचाउने गरेको पाइन्छ ।

नो लोकल, नो सिन्डिकेट
ग्राहकले गरेको बुकिङ अनुसार तोकिएको समयमै गाडी छुटाउने र पु¥याउने व्यवस्था हुन्छ । यसले गर्दा सिट भन्दा जति थोरै यात्रु भए पनि गाडी अगाडि बढिहाल्छ । बिचमा कुनै यात्रु चढाउने गरिदैन । बुकिङ गरेका यात्रुलाई भने जुनसुकै स्थानबाट पनि चढाउन सकिन्छ ।

उस्तै भाडा
चितवनमा सामान्य बसको भाडा करिव ७ सय हाराहारी हुँदा यी बसको भाडा ९ सय हाराहारी छ । पोखरामा सामान्य भाडा करिव १२ सय जति हुँदा प्रिमियम सोफा सहितको टुरिस्ट बसको भाडा १६ सय रुपैयाँ मात्र छ । यसमा पाइने सुविधा समेत विशेष छ ।

अनलाइनबाटै बुकिङ
टुरिस्ट बस एसोसिएसन नेपालको अनलाइन पोर्टल र एप्समार्फत बस टिकट लिन सकिन्छ । त्यसैगरी मास्टर कार्ड र भिसा कार्डबाट नेपाल बाहिरैबाट समेत सेवा लिन सकिन्छ । यसले गर्दा पर्यटकहरुलाई सहज हुन्छ ।

सुरक्षित यात्रा, दुर्घटनाको जोखिम कम
नेपालमा सडक दुर्घटना भइरहन्छ । टुरिस्ट बस भने यसमा अपवाद छ । सौभाग्य नै भन्नु पर्छ, हाल सम्म टुरिस्ट बसमा त्यस्तो ठूलो दुर्घटना भएको छैन । यसबाट कुनै मानवीय क्षति भएको छैन । ६० किलोमिटर प्रतिघण्टाको गति भन्दा माथिको गतिमा गाडी चलाउन नपाइने नियम छ । चालक नियुक्ति गर्दा नै विशेष सावधानी अपनाउने गरिन्छ । खासगरी पूर्व प्रहरी वा आर्मीहरु नै चालक छन् । घुम्न जाने यात्रुहरु त्यति धेरै हतारका साथ यात्रा गर्नुपर्ने आवश्यकता नहुने भएकाले स्पिड पनि कम हुन्छ । स्पिड लिमिट नै राखिएको हुन्छ । त्यसैगरी चोरी, डकैतीको डर पनि हुँदैन ।