विश्वभर गरिने द डिस्टिङग्विस्ड जेन्टलम्यान राइड नेपालमा समेत हुँदै

विश्वभर सम्पन्न हुने द डिस्टिङग्विस्ड जेन्टलम्यान राइड आगामी मे २० अर्थात जेठ ६ गते काठमाडौंमा समेत हुने भएको छ । कोट पाइन्ट लगायतका पोशाक लगाएर ड्यापर स्टाइलमा सजिएका राइडरहरु सहभागी हुने सो राइड विश्वभर लोकप्रिय छ ।

पुरुषहरुको मानसिक स्वास्थ्य र प्रोस्टेट क्यान्सरको वारेमा जनचेतना जगाउन आयोजना गरिने सो राइड फ्रेन्ड्स अफ रोयल इन्फिल्ड नेपाल (फोरे नेपाल) को संयोजनमा हुनेछ ।

काठमाडौंको ज्ञानेश्वरस्थित एटिक क्याफेबाट शुरु हुने सो राइड पाटन दरबार स्क्वायर, काठमाडौं दरबार स्क्वायर हुँदै पुनः एट्टिकमै पुगेर समापन हुनेछ । एट्टिकमा पुगे पछि लाइभ ब्यान्ड लगायतका विभिन्न मनोरञ्जनात्मक कार्यक्रम गरी राइड समापन हुनेछ ।

सो कार्यक्रममा जावा, रोयल इन्फिल्ड लगायतका भिन्टेज र क्लासिक बाइक राइडरहरु सहभागी हुन सक्ने छन् । सो कार्यक्रममा सहभागी हुन चाहनेहरुले रजिष्ट्रेसन गर्नुपर्छ । उनीहरुले यसका लागि आवश्यक रकम आफ्नो इच्छा अनुसार सहयोग पनि गर्न सक्छन् ।

फोरे नेपालका अध्यक्ष सुनिल मानन्धर ‘डायमन्ड’ का अनुसार गत वर्ष नेपालबाट ३७५ अष्ट्रेलियन डलर संकलन गरिएको थियो । यस वर्ष अहिले नै ५ सय डलर भन्दा बढी संकलन भइसकेको छ भने करिव १ हजार ५ सय डलर उठ्ने अनुमान गरिएको छ ।

यो वर्ष चितवन र धरानमा समेत यो कार्यक्रम हुँदैछ । चितवनमा रोयल राइनो राइडर्स र धरानमा इस्टर्न इन्जिनियरिङले फोरे नेपालको सहकार्यमा यो कार्यक्रम गर्दैछन् ।

द डिस्टिङग्विस्ड जेन्टलम्यान राइडले विश्वमा हुने विभिन्न इभेन्ट मध्ये सबैभन्दा ठूलो र आश्चर्यजनक इभेन्टको पहिचान कायम गरेको छ । डीजीआर वर्ल्डवाइड र यसको च्यारिटी पार्टनर ‘मोभेम्बर’ मार्फत प्रोस्टेट क्यान्सर तथा पुरुषहरुमा हुने मानसिक स्वास्थ्यको वारेमा चेतना जगाउन यसले महत्वपूर्ण भूमिका खेलेको छ ।

द डिस्टिङगुइस्ट जेन्टलम्यान राइड कार्यक्रममा सामेल हुने राइडरहरु ८० प्रतिशत पुरुष र २० प्रतिशत महिला हुन्छन् । उनीहरुको औसत उमेर ४५ वर्ष हुने बताइएको छ ।

नेपालमा सन् २०१६ देखि यो राइड प्रारम्भ भएको थियो ।