बागमती प्रदेशभित्र गाडी भाडामा डिजिटल भुक्तानी प्रणालीको काम रोकियो

बागमती प्रदेशको श्रम, रोजगार तथा यातायात मन्त्रालयले सवारी साधनको भाडा डिजिटल माध्यमबाट भुक्तानी गर्न मागेको प्रस्ताव हालको लागि स्थगित गरेको छ ।मन्त्रालयले यसअघि गाडीको भाडा भुक्तानीका लागि सेवा प्रदायक छनौट गर्ने तयारी गरेको थियो । यसको लागि सेवा प्रदायक कम्पनीहरुलाई ३० दिनभित्र प्रस्तावसहितको निवेदन दिन भनेको थियो ।

मन्त्रालयले भुक्तानी प्रणालीमार्फत भाडा भुक्तानी गर्ने सेवा दिने कम्पनीहरुलाई आवेदन दिन भनेकोमा हाल थप अध्ययन गर्ने बताईएको छ । ‘सो विषयमा थप अध्ययन परामर्श र तयारीका साथ पुन सूचना प्रकाशित गर्ने गरी उक्त सूचना र सोसँग सम्बन्धित खरिद प्रक्रिया हाललाई रद्द गरिएको छ,’ रोजगार तथा यातायात मन्त्रालयले भनेको छ ।

मन्त्रालयले बागमती प्रदेश भित्रका यात्रुबाहक सार्वजनिक सवारी साधनमा नगदरहित विद्युतीय भुक्तानी प्रणालीमार्फत प्रिपेड कार्डबाट भाडा भुक्तानी गर्ने व्यवस्था गराउन लागेको हो । मन्त्रालयले यसअघि नै अनलाइन तथा डिजिटल भाडा भुक्तानीका लागि प्रदेश भाडा निर्धारण र समायोजन तथा विद्युतीय माध्यमबाट भाडा भुक्तानी नियमावी २०७८ स्वीकृत गरिसकेको छ ।