दिपल एस०५ र नामी ०६ को मूल्य सार्वजनिक, नाडा अटो शोमार्फत बिक्री सुरु हुँदै

काठमाडौं–एमएडब्लु बृद्धिले नेपाल ल्याउन लागेको इलेक्ट्रिक कार दिपल एस०५ र नामी ०६ को मूल्य सार्बजनिक भएको छ । कम्पनीले भन्सार प्रयोजनका लागि यी ईभीको मूल्य सार्बजनिक गरेको हो । यी दुबै ईभी आगामी भदौ ३ गतेबाट सुरु हुने नाडा अटो शोमार्फत औपचारिक लन्च हुने तयारीमा छन् ।

एमडब्लु बृद्धिका अनुसार दिपल एस०५ तीनवटा भेरिएन्टमा उपलब्ध हुनेछ । जसअनुसार, लाइट भेरिएन्टको मूल्य ६२ लाख ९९ हजार, प्लसको ६५ लाख ९९ हजार र म्याक्सलाई ६७ लाख ९९ हजार रुपैयाँ पर्ने बताइएको छ ।

एस०५ लाई कम्पनीले थाइल्यान्डबाट आयात गरी ल्याउन लागिएको हो । यस इलेक्ट्रिक एसयूभीमा ९९ किलोवाट क्षमताको मोटर जडान गरिएको छ भने ब्याट्रीका विषयमा कुनै जानकारी दिइएको छैन ।

यसैगरी, एमएडब्लु बृद्धिले ल्याउन लागेको अर्को वहुप्रतिक्षित इलेक्ट्रिक कार नामी ०६ समेत तीनवटै भेरिएन्टमा उपलब्ध हुने जनाइएको छ । प्रकाशित मूल्य सुचीअनुसार यस कारको ई१, ई२ र ई३ भेरिएन्ट नेपाल आउन लागेको हो । नामी०६ दुईवटा ब्याट्रीको अप्सन पाइनेछ ।

नामी ०६ को ई१ र ई२ मा ४४.९४ किलोवाट आवरको ब्याट्री प्याक उपलब्ध हुनेछ भने ई३ मा ५१.८७ किलोवाट आवरको ब्याट्री प्याक राखिएको छ । यसको मूल्य क्रमशः ५७ लाख ९९ हजार, ६० लाख ९९ हजार र ६२ लाख ९९ हजार रुपैयाँ निर्धारण गरिएको छ । कारमा ९९ किलोवाट क्षमताको इलेक्ट्रिक मोटर जडान गरिएको छ ।

भन्सार प्रयोजनका लागि सार्बजनिक भएकाले यी दुबै ईभीको मूल्यमा पछि थपघट हुन सक्नेछ ।