सीएफमोटो ४५० एमटी राइडर अपर मुस्ताङ पुग्ने, एड्भेन्चर राइडको मज्जा लिने

काठमाडौं – नेपालका लागि सीएफमोटो बाइकको आधिकारिक वितरक रिलायन्स ग्रुप अन्तर्गतको ऋषि ट्रेड सेन्टरले ‘सीएफमोटो एड्भेन्चर राइड २०२४ : अपर मुस्ताङ’ को आयोजना गर्ने भएको छ ।

नेपालमा हालै लन्च गरिएको सीएफमोटोको ४५० एमटी एड्भेन्चर टुरिङ मोटरसाइकलको बोल्ड स्पिरिट र रोबस्ट परफर्मेन्स प्रदर्शन गर्नका लागि सो असाधारण अभियान विशेष रुपमा डिजाइन गरिएको हो ।

गत भदौ महिनामा सम्पन्न नाडा अटो शो २०२४ मा डेब्यु गरिए पश्चात ४५०एमटीले धेरै एड्भेन्चर पारखीहरुका लागि साथमा हुनै पर्ने बाइकको रुपमा पहिचान कायम गरेको कम्पनीको भनाइ छ । अब राइडरहरुले बाइकमा भएको क्षमतालाई नेपालको सबैभन्दा कठोर र लोभलाग्दो भूगोलमा प्रत्यक्ष रुपमा अनुभव गर्ने अवसर प्राप्त गर्नेछन् ।

आगामी डिसेम्बर २ अर्थात मंसिर १७ देखि प्रारम्भ हुने सो एड्भेन्चर डिसेम्बर ८ अर्थात मंसिर २३ सम्म चल्ने छ । राइडरहरुले सो अवसरमा काठमाडौं देखि कोरला बोर्डर सम्मको १ हजार किलोमिटर भन्दा बढीको यात्रा अनुभव गर्नेछन् ।

काठमाडौंबाट यात्रा प्रारम्भ भए पश्चात राइडरहरु चितवन राष्ट्रिय निकुञ्ज, तानसेन, कालापानी लगायतका विभिन्न भौगोलिक क्षेत्र हुँदै प्रसिद्ध धार्मिक स्थल मुक्तिनाथ र लोमान्थाङ हुँदै कोरला बोर्डर पुग्ने छन् । सो अवसरमा राइडरहरुले अविस्मरणिय एड्भेन्चर राइडको अनुभव गर्नेछन्, जुन रुटमा उनीहरुले प्राकृतिक सौन्दर्यता, टेक्निकल अफरोड च्यालेन्ज र समृद्ध सांस्कृतिक अनुभव गर्न सक्ने छन् ।

‘सो राइड साहसिक यात्राको सार हुनेछ । कुनै पनि टेरेनमा पुग्न सक्षम मोटरसाइकलमा सवार भएर राइडरहरुले अटुट ट्रेल र नेपालको लुकेका रत्नरुपी दृश्यहरु पत्ता लगाउने छन्,’ ऋषि ट्रेड सेन्टरका म्यानेजिङ डाइरेक्टर उज्वल जोशीले भने, ‘इन्ड्युरेन्स, एक्सप्लोरेसन र मोटरसाइक्लिङको ट्रयु स्पिरिटको सही अनुभव यसले दिनेछ ।’

सो एड्भेन्चर राइडमा सहभागी हुन र यसको मज्जा लिन कम्पनीले सबैलाई आग्रह गरेको छ । यसको वारेमा विस्तृत जानकारी लिनका लागि सीएफमोटो नेपालको सोसल मिडिया र अन्य आधिकारिक वेबसाइट हेर्न समेत कम्पनीले अनुरोध गरेको छ ।