सीएटीएलको ब्याट्री अव निकै कम मूल्यमा मर्मत गर्न सकिने, सुरु भयो रिपेयर सर्भिस सेन्टर

काठमाडौं–विश्वको सबैभन्दा ठूलो ईभी ब्याट्री उत्पादक कम्पनी सीएटीएलले ब्याट्री रिपेयर सेन्टर सञ्चालनमा ल्याएको छ । कम्पनीले आफ्टर मार्केट ब्राण्ड ‘निङ सर्भिस’ का नाममा नयाँ कम्पनी खोलेर यस्तो सेवा सुरु गरेको हो ।

न्यू इनर्जी भेइकलको बिक्रीले गति लिन थालेपछि निङ सर्भिसले निकै कम मूल्यमा ब्याट्री मर्मत गर्न सेवा सुचारु गरेको हो । जसअनुसार, ब्याट्री फेर्दा लाग्ने खर्चको एकदमै कम हिस्सामा यसको मर्मत गर्न सकिन्छ । जसका लागि सीएटीएलले १० वर्षअघि स्थापना भएको निङ सर्भिसलाई ब्याट्री मर्मत सम्भार गर्ने एक स्वतन्त्र र डेडिकेटेड कम्पनीका रुपमा अघि बढाएको छ ।

निङ सर्भिसका अनुसार ईभीमा रहेको ब्याट्री फेर्न १० हजार डलर लाग्छ भने मर्मत गर्न केबल १ हजार ३०० देखि २ हजार ७०० डलरसम्म पर्छ । कम्पनीले अहिलेलाई सीएटीएलले बनाएको ब्याट्री प्याकमा मात्रै सेवा उपलब्ध गराउने छ ।

निङ सर्भिसको विश्वका ७५ देशमा ११०० वटा सर्भिस आउटलेट छ । कम्पनीको चीनमा मात्रै ८०० भन्दा बढी यस्ता सर्भिस सेन्टर सञ्चालनमा छन् । यो कम्पनीको मुख्य काम ब्याट्री परीक्षण र मेन्टिनेन्स गर्नु हो ।