भारतमा सार्वजनिक भयो बीवाईडी एट्टो३ इलेक्ट्रिक कार : नेपालमा आगामी शनिबार लन्च हुने

प्रतिष्ठित चाइनिज ब्रान्ड बीवाईडीको नयाँ इलेक्ट्रिक कार एट्टो३ भारतमा आज सार्वजनिक गरिएको छ । ५० हजार भारुका साथ बुकिङ गर्न सकिने सो इलेक्ट्रिक कार आगामी जनवरी देखि डेलिभरी गरिने छ ।

भारतमा सार्वजनिक गरिएको बीवाईडी एट्टो३ मा ६०.४८ किलोवाट आवरको ब्लेड ब्याट्री प्रयोग गरिएको छ, जसले ५२१ किलोमिटरको रेन्ज दिने बताइएको छ । डीसी फास्ट चार्जरको सहयोगले यसको ब्याट्रीलाई ५० मिनेटमै ८० प्रतिशत सम्म चार्ज गर्न सकिने कम्पनीले बताएको छ ।

यसमा एन्ड्रोइड अटो र एप्पल कारप्ले सहितको १२.८ इन्चको टचस्क्रिन इन्फोटेनमेन्ट सिस्टम, प्यानोरामिक सनरुफ, ८ स्पिकर, एलईडी लाइटिङ सिस्टम, डिजिटल इन्स्ट्रयुमेन्ट क्लस्टर आदि फिचर उपलब्ध छ ।

सुरक्षाका लागि यसमा ७ एयरब्याग, टीपीएमएस, फ्रन्ट र रियर पार्किङ सेन्सर, ३६० डिग्री पार्किङ क्यामेरा, ईबीडी सहितको एबीएस, ईएसपी, टीसीएस, अल ह्विल डिस्क ब्रेक र अन्य धेरै फिचर छन् ।

भारतमा यो गाडीको मूल्य अर्को महिना मात्र सार्वजनिक गरिने बताइएको छ ।

नेपाली बजारका लागि आगामी शनिबार बीवाईडी एट्टो३ लन्च हुँदैछ । नेपालका लागि बीवाईडीको आधिकारिक वितरक साइमेक्स इंक प्रालिले आगामी शनिबार बीवाईडी एट्टो३ को ग्रान्ड लन्च गरिने जानकारी सामाजिक सञ्जालमार्फत दिइसकेको छ ।