बनेको मितिलाई आधार मानेर यसरी गर्छ बैंकले सेकेन्ड ह्यान्ड गाडीमा लगानी

नेपालका प्राय बैंक तथा बित्तिय संस्थाले सकेन्ड ह्यान्ड गाडीमा लगानी गर्न खासै रुचाउने गरेको पाइदैन । यस्ता गाडीमा जोखिम बढी हुने भन्दै लगानी गर्न नरुचाउने गरेको पाइएपनि केही बैंकले भने जोखिमलाई आंकलन गरेर ढुक्क भएपछि मात्र लगानी गर्ने गरेको पाइन्छ ।

सेकेन्ड ह्यान्ड गाडीमा लगानी गर्नुपूर्ब बैंकले गाडीको कन्डिसन, उत्पादन मिति र ग्राहकको आयस्रोतलाई अध्यान गर्छन् । गाडीको उत्पादन भएको मितीबाट बढीमा ७ बर्षसम्मको अबधीलाई आधार मानेर मात्र उनीहरुले लोनको प्रक्रिया अघि बढाउने गरेको याला ड्रिम मोटर्सका रिबन्द्र श्रेष्ठ बताउँछन् । जसअनुसार हाल २०१५ भन्दा तलको मोडलमा बैंकले लोन नदिने उनले बताए ।

कुनै ग्राहकले २०१८ मोडलको गाडी खरिद गर्न चाहेमा उसले २०२५ भित्र सबै लोन चुक्ता गरिसक्नु पर्ने हुन्छ । यस आधारमा उसले जम्मा ३ बर्षको लागी मात्र लोनको सुबिधा पाउँछ । डाउनपेमेन्टको ब्यवस्था भने यस्ता गाडीमा समेत नयाँ गाडीकै सरह ब्याक्तीको हकमा ५० प्रतिशत र कम्पनीको हकमा ६० देखी ७० प्रतिशतसम्म तोकिएको छ ।

यस्ता गाडीमा लाग्ने ब्याजदर समेत नयाँको तुलनामा ३ प्रतिशतसम्मले बढी रहने श्रेष्ठ बताउँछन् । जसका आधारमा अहिले बैंकहरुले नयाँ गाडीमा १२ प्रतिशतसम्मको ब्याज लिँदै आएकोमा पुराना गाडीमा यो दर १५ प्रतिशत पुग्ने देखिन्छ । यसमा १ प्रतिशत सेवा शुल्क र गाडीको मूल्य अनुसार फुल इन्सुरेन्स गराउनुपर्छ । यदि कुनै ग्राहकले २० लाख रुपैयाँसम्मको गाडी खरिद गर्न चाहेमा इन्सुरेन्सका लागि ३० देखी ३२ हजार रुपैयाँ जोहो गर्नुपर्नेछ ।

हाल बैंक तथा बित्तिय संस्थामा तरलता अभाव चर्किदै गएका कारण बैंकहरुले पुराना गाडीमा लगानी गर्ने काम ठप्प पारेको र परिणाम स्वरुप गाडीको कारोबार ७५ प्रतिशतसम्मले कम भएको उनले बताए ।