बजाज र ट्रायम्फको सहकार्यमा भोलि सार्वजनिक हुँदै नयाँ बाइक, टिजर सार्वजनिक

ट्रायम्फ मोटरसाइकलले सामाजिक सञ्जालमा ‘मोटरसाइकलमा ऐतिहासिक क्षण’ को प्रतिज्ञा गर्दै नयाँ भिडियो जारी गरेको छ । बजाज अटोको सहकार्यमा विकास गरिएको सो बाइक २७ जुनमा विश्वव्यापी रूपमा सार्वजनिक गर्ने तयारी छ र जुलाई ५ मा भारतमा लन्च हुँदैछ । यो बाइक नेपालमा आउने तत्काल सम्भावना नभए पनि बाइकको वारेमा चासो भने धेरैलाई छ ।

लामो समयदेखि प्रतीक्षित नयाँ ट्रायम्फ रोडस्टर र स्क्रयाम्बलर जस्ता स्टाइलमा आउने सम्भावना छ । सो बाइक ३५० देखि ४०० सीसी इन्जिनमा ल्याउने अपेक्षा गरिएको छ । सो बाइक बेलायतको हिंकलेमा डिजाइन र विकास गरिएको हो ।

सो बाइकमा सिंगल एक्जस्ट, पछाडि बस्नका लागि रियर ग्र्याब ह्यान्डल, सिंगल पिस सिट र बार एन्ड मिरर देख्न सकिन्छ । बाइकमा रेट्रो स्टाइल एलईडी हेडलाइट, सामान्य फ्युल ट्यांकी र खुला फ्रेम डिजाइन रहेको छ ।

नयाँ ट्रायम्फ बजाजको प्लान्टमा उत्पादन गरी विश्वभर निर्यात गरिनेछ । यसको मूल्य २ लाख ५ हजार देखि ३ लाख भारु बीच हुने अनुमान गरिएको छ ।

नयाँ ट्रायम्पले भारतीय बजारमा रोयल इन्फिल्ड स्क्रयाम ४११, येज्दी स्क्रयाम्बलर, जोन्टेस जीके ३५०, नयाँ हार्ले डेभिडसन एक्स४४० र रोयल इन्फिल्ड हन्टर ४५० जस्ता बाइकसँग प्रतिस्पर्धा गर्नेछ ।