बजाज मोटरसाइलको बिक्रीमा ४२ प्रतिशतले बृद्धि, नेपालमा आर्थिक मन्दिको मार

भारतमा बजाजको बिक्री उच्च दरले बृद्धि भएको छ । पल्सर सिरिजको बिक्रीमा उछाल आएपछि बजाजको बिक्री गत वर्षको फेब्रुअरी महिनाको तुलनामा यस वर्ष ४२ प्रतिशतले बृद्धि भएको हो । निर्यातमा समेत अघिल्लो वर्षको सोही महिनाभन्दा ८ प्रतिशतले बृद्धि भएको छ ।

फेब्रुअरी महिनामा बाजजले भारतमा १ लाख ७० हजार ५२७ यूनिट मोटरसाइकल बिक्री गरेको कम्पनीले जनाएको छ । जुन अघिल्लो वर्षको सोही महिनामा बिक्री भएको १ लाख २० हजार ३३५ युनिटको तुलनामा ४२ प्रतिशले बढी हो ।

साथै अघिल्लो वर्षको सोही महिनामा १ लाख १५ हजार मोटरसाइकल निर्यात गरेकोमा गत महिना १ लाख २४ हजार १५७ यूनिट पुर्याउँदै ८ प्रतिशतले निर्यात बढाएको छ । देशको ग्रामिण भागमा पल्सर बाइकको माग बढेसंगै बिक्री पनि बढेको कम्पनीको भनाई छ ।

भारतमा उच्च दरको बृद्धि हाँसिल गरेपनि बिगत २ बर्षयता नेपाली बजारमा भने बजाज लगायत समग्र टु–ह्विलरको बिक्रीमा कमी आइरहेको छ । आर्थिक मन्दिका कारण बजार ७० प्रतिशतसम्म कम भएपछि बजाजको बिक्री पनि प्रभावित बनेको हो ।

बजाजको नेपालका लागि आधिकारिक वितरक हंसराज हुलासचन्द एण्ड कम्पनीले स्वदेशमै प्लान्ट स्थापना गरी बिभिन्न मोडलका मोटरसाइकल उत्पादन गर्दै आएको छ ।