राइडरको रोजाइमा बजाज पल्सर एन १६० : यसरी लिन सकिन्छ यो मोटरसाइकल

नेपाली बजारमा उपलब्ध बजाजका मोटरसाइकल मध्ये पछिल्लो समयमा धेरैले रुचाउने गरेको मोडल हो पल्सर एन १६० । गत कात्तिक महिनाको प्रारम्भमा नेपाली बजारमा भित्रिएको यो मोटरसाइकल अहिले धेरै राइडरहरुको रोजाइमा पर्ने मोटरसाइकल मध्ये एक भएको नेपालका लागि आधिकारिक वितरक हंसराज हुलासचन्द एन्ड कम्पनीको भनाइ छ ।

हाल ड्युअल च्यानल एबीएस सहितको पल्सर एन १६० नेपाली बजारमा उपलब्ध छ । यसको मूल्य ३ लाख ८६ हजार ९ सय रुपैयाँ छ । ग्राहकले पुरै नगद तिरेर बाहेक केही प्रतिशत रकम डाउन पेमेन्टको रुपमा उपलब्ध गराएर बाँकी रकम मासिक किस्ताबन्दीको रुपमा भुक्तानी गर्न सकिने सुविधा समेत उपलब्ध छ । यसका लागि हुलास फिन सर्भले फाइनान्स सुविधा उपलब्ध गराउने गरेको छ ।

यो मोटरसाइकल लिन चाहनेले २५ प्रतिशत देखि ६० प्रतिशत सम्म रकम डाउन पेमेन्टको रुपमा बुझाउन सकिन्छ । २५ प्रतिशत र ४० प्रतिशत रकम शुरुमा बुझाउदा बाँकी रकम २४ महिना सम्म किस्ताबन्दीमा बुझाउन सकिन्छ भने ५० र ६० प्रतिशत रकम बुझाउदा १८ महिना सम्म मात्र बुझाउनु पर्छ ।

यसरी लिदा २५ प्रतिशत बुझाउदा मासिक रुपमा २४ महिना सम्म १४ हजार ४ सय र ४० प्रतिशत बुझाउदा ११ हजार ३ सय बुझाउनु पर्छ । यसमा क्रमशः १७ र १६ प्रतिशत ब्याज लाग्छ । शुरुमा डाउन पेमेन्टको रुपमा क्रमशः ९६ हजार ७२५ र १ लाख ५४ हजार ७६० रुपैयाँ बुझाउनु पर्छ ।

त्यसैगरी ५० प्रतिशत शुरुमा बुझाउदा १ लाख ९३ हजार ४५० शुरुमा बुझाउनु पर्छ र बाँकी रकम १८ महिना सम्म ११ हजार ३ सयको दरले किस्ताबन्दीको रुपमा बुझाउन सकिन्छ । यसमा ७ प्रतिशत मात्र ब्याज लाग्छ । यसैगरी ६० प्रतिशत डाउन पेमेन्ट बुझाउदा पनि यही अनुसार नियम छ ।

यो वाहेक हाल बजाजले नयाँ वर्षको अवसरमा समेत विभिन्न स्किम उपलब्ध गराइरहेको छ । ती स्किम अन्तर्गत विभिन्न अफर समेत प्राप्त गर्न सकिन्छ ।

यस्तो छ पल्सर एन १६०
पल्सर २५० कै प्ल्याटफर्म प्रयोग गरेर बनाइएको पल्सर एन १६० मा ड्युअल च्यानल एबीएस प्रयोग गरिएको छ जुन यो भन्दा अगाडिको मोडलहरुमा प्रयोग गरिएको थिएन । साथै यसमा १६५ सीसी बीएस६ इन्जिन, एलइडि प्रोजेक्टर हेड्ल्याम्प रहेका छन् । यस अघि कहिल्यै नभएको पावर, प्रेसिजन र कन्ट्रोल प्रदान गर्ने हिसाबले यस बाइकको डिजाइन गरिएको कम्पनीले जनाएको छ ।

स्पोर्टि लुक भएको र हरेक दिन चलाउन मिल्ने बाइक खोजिरहेका युवा पुस्तालाई यो बाइक मन पर्ने कम्पनीको भनाइ छ ।

यसमा जडान गरिएको इन्जिनले अधिकतम १६ पीएसको पावर र १४.६५ एनएमको टर्क निकाल्न सक्छ । सुधारिएको पिकअपको लागि ८५ प्रतिशतसम्म पिक टर्क उपलब्ध रहेको कम्पनीले दावी गरेको छ । यसमा ५ स्पिडको गियर बक्स छ । मोनो शक रियर सस्पेन्सन, एलइडि प्रोजेक्टर हेडल्याम्प, अन्डर बेली एग्जस्ट सिस्टम युक्त यो बाइक ट्युबुलर फ्रेम च्यासिसमा बनाइएको छ ।

साथै यसमा पल्सर एन २५० कै जस्तै फ्युल ट्यांक एक्स्टेन्सन, स्प्लिट सिट, अलोय व्हिल र टेल लाइट राखिएको छ ।