महंगो भयो बजाज मोटरसाइकल, यस्तो छ नयाँ मूल्य

काठमाडौं– बजाज मोटरसाइकलको नेपालका लागि आधिकारिक वितरक हंसराज हुलासचन्द एन्ड कम्पनीले १२ वटा मोडलमा मूल्य बृद्धि गरेको छ । यी मोटरसाइकलमा ३ हजार रुपैयाँसम्म बढाएर कम्पनीले नयाँ मूल्यसूची सार्वजनिक गरेको हो । वाँकी मोटरसाइकलमा भने पुरानै मूल्यलाई निरन्तरता दिइएको छ ।

कम्पनीले प्लाटिना, डिस्कोभर १२५ एसटी, पल्सर १५० एसडी तथ टिडी, पल्सर २२० एफ एविएस, पल्सर एनस २०० एविएस, एभेन्जर १६० स्ट्रिट र एभेन्जर २२० क्रुजमा ३ हजारका दरले मूल्य बढाएको छ भने डिस्कोभर १२५ डिस्क, पल्सर १२५ डिस्क, पल्सर १२५ एनएस र पल्सर १६० एनएस डुअल एविएस मा २ हजारका दरले बृद्धि गरेको छ ।

यसअघि १ लाख ९९ हजार ९०० रुपैयाँमा बिक्री हुँदै आएको प्लाटिनाको नयाँ मूल्य २ लाख २ हजार ९०० पुर्याइएको छ भने २ लाख ४३ हजार ९०० मा बिक्री हुँदै आएको पल्सर १२५ एसटीको २ लाख ४६ हजार ९०० पुगेको छ ।

यसैगरी, २ लाख ९५ हजार ९०० मा बिक्री हुँदै आएको पल्सर १५० एसडीको नयाँ मुल्य २ लाख ९८ हजार ९०० पुगेको छ भने ३ लाख १३ हजार ९०० पर्ने पल्सर १५० टीडीको ३ लाख १६ हजार ९०० कायम गरिएको छ । साथै, पल्सर २२० एफ एविएस, पल्सर एनएस २०० एविएस, एभेन्जर १६० स्ट्रिट र एभेन्जर २२० क्रुजमा पनि ३ हजार रुपैयाँका दरले बृद्धि गरिएको छ । यी बाइकको नयाँ मूल्य क्रमशः ३ लाख ९९ हजार ९००, ३ लाख ९१ हजार ९००, ३ लाख ६८ हजार ९०० र ४ लाख १२ हजार ९०० पुगेको हो ।

२ हजार रुपैयाँका दरले बृद्धि भएका डिस्कोभर १२५ डिस्क, पल्सर १२५ डिस्क, पल्सर १२५ एनएस र पल्सर एनएस १६० डुअल एविएसको नयाँ मूल्य क्रमश ३ लाख ३८ हजार ९००, २ लाख ५९ हजार ९००, २ लाख ८७ हजार ९०० र ३ लाख ८६ हजार ९०० तोकिएको छ ।

वाँकी मोडलहरु डोमिनार २५०, डोमिनार ४०० पल्सर २५० एन, पल्सर २०० एनएस नन् एविएस, २०० एनएस एफआई एविएस विएस६ र २०० एनएस एफआई डीसी एविएस विएस६ मा भने पुरानै मूल्यलाई नितरन्तरता दिइएको छ ।