पल्सर एन सिरिज र डोमिनारको मूल्य वढ्यो, यस्तो छ नयाँ मूल्य

काठमाडौं– बजाज मोटरसाइकलको नेपालका लागि आधिकारिक विक्रेता हंसराज हुलासचन्द एन्ड कम्पनीले पल्सर एन सिरिज र डोमिनार विएस६ सिरिजको मूल्य बृद्धि गरेको छ । कम्पनीले एन सिरिजका १६० तथा २५० र डोमिनार २५० तथा ४०० विएस६ मा १० हजार रुपैयाँसम्मले मूल्य बृद्धि गरेको हो ।

सवैभन्दा वढी डोमिनार ४०० विएस६ मा १० हजार र वाँकी तीन मोडलमा ५ हजार रुपैयाँका दरले मूल्य बृद्धि भएको छ । वाँकी मोडलमा भने पुरानै मूल्य कायम गरिएको छ । बजाजले कुल १८ मोडलका मोटरसाइकल बिक्री गर्दै आइरहेको छ ।

मूल्य बृद्धि भएसंगै यसअघि ३ लाख ७८ हजार ९०० रुपैयाँमा बिक्री हुँदै आएको पल्सर एन १६० को नयाँ मूल्य ३ लाख ८३ हजार ९ सय पुगेको छ भने पल्सर एन २५० को ४ लाख ९४ हजार ९०० कायम गरिएको छ ।

यसैगरी डोमिनार २५० विएस६ को मूल्य ५ लाख ९४ हजार ९०० र डोमिनार ४०० को ६ लाख ५४ हजार ९०० पुगेको छ । यसअघि यी दुई मोटरसाइकलको मूल्य क्रमश ५ लाख ८९ हजार ९०० र ६ लाख ४४ हजार ९०० कायम गरिएको थियो ।

बजाजका सवैजसो मोटरसाइकल नेपालमै एसेम्वल हुँदै आइरहेका छन् । हरेक महिना जसो मूल्य वढाउँदै आएको कम्पनीले एक महिना अघिमात्र १४ मोडलको मूल्य बृद्धि गरेको थियो ।