बजाजको कोभिड–१९ राहत : मृतक कर्मचारीका परिवारलाई दुई वर्ष सम्म आर्थिक सहायता दिइने

भारतमा बजाज अटोले आफ्ना कर्मचारीहरुका लागि कोभिड–१९ को समय विशेष राहत प्याकेजको घोषणा गरेको छ । कम्पनीले आफ्नो प्लान्ट भएका सबै स्थानका कर्मचारी, उनका परिवार र समुदायका लागि २५० भन्दा धेरै बेडको व्यवस्था गरेको बताएको छ । त्यसैगरी कम्पनीका कुनै पनि कर्मचारीको कोभिड–१९ का कारण मृत्यु भयो भने उनका परिवारलाई दुई वर्ष सम्म आर्थिक सहायता दिइने छ ।

त्यसैगरी कर्मचारीका परिवारको शैक्षिक कार्यमा समेत सहयोग गर्नेछ । अस्पतालमा ५ वर्ष सम्म औषधि उपचार गर्नका लागि हस्पिटलाइज बिमाको समेत व्यवस्था गरिने कम्पनीको भनाइ छ ।

हाल भारतमा विभिन्न अटोमोबाइल कम्पनीहरुले विभिन्न प्रकारका राहत प्याकेजको घोषणा गरिरहेका छन् । बजाजले गत वर्ष पनि यस्तै प्रकारका विभिन्न सहयोग गरेको थियो ।

भारतमा विभिन्न अटोमोबाइल कम्पनीहरुले बिरामीलाई विभिन्न प्रकारका सहयोग गरिरहेका छन् । त्यसैगरी परीक्षण र खोप अभियानमा समेत सहयोग गर्नुका साथै खाद्य वितरण समेत गरिरहेका छन् ।

गत वर्ष बजाजले विभिन्न सरकारी, गैरसरकारी र स्थानीय प्रशासनको पहलमा विभिन्न क्षेत्रका लागि ३ अर्ब भारुको सहयोग गरेको थियो । यस अन्तर्गत १२ अक्सिजन प्लान्ट र श्वासप्रश्वासका लागि सहायक विभिन्न उपकरण समेत सामेल थिए ।