पूर्व नाडा अध्यक्ष अञ्जन श्रेष्ठ बने उद्योग वाणिज्य महासंघको वरिष्ठ उपाध्यक्ष

काठमाडौं – नाडा अटोमोबाइल्स एसोसिएसन अफ नेपालका पूर्व अध्यक्ष अञ्जन श्रेष्ठ नेपाल उद्योग वाणिज्य महासंघको वरिष्ठ उपाध्यक्षमा निर्वाचित भएका छन् ।

वरिष्ठ उपाध्यक्षका लागि तीन जना प्रत्याशी अञ्जन श्रेष्ठ, उमेशलाल श्रेष्ठ र रामचन्द्र संघईको उम्मेदवारी परेको थियो ।

बुधबार भएको निर्वाचनको सबै मत परिणाम आज बिहान सार्वजनिक हुँदा कसैले पनि ५० प्रतिशत मतभार कटाउन नसकेपछि सबैभन्दा धेरै मत पाएका अञ्जन र उमेशबीच दोस्रो चरणको निर्वाचन हुने भएको थियो । अञ्जनलाई वरिष्ठ उपाध्यक्षमा उमेशलालले समर्थन गर्ने सहमति जनाएपछि अञ्जन निर्विरोध निर्वाचित भएका हुन् ।

अञ्जनले ३७.९९ प्रतिशत मत ल्याए भने उनका निकटतम प्रतिस्पर्धी उमेशलालले ३१,७१ प्रतिशत मत पाए । ३०.४६ प्रतिशत मत पाएका संघाइ दोस्रो चरणको प्रतिस्पर्धाबाट बाहिरिएका थिए ।

महासंघको विधान अनुसार वरिष्ठ उपाध्यक्षमा चुनिएको उम्मेदवार तीन वर्षे कार्यकालपछि स्वतः अध्यक्ष हुने व्यवस्था छ ।

नेपाली अटोमोबाइल क्षेत्रमा लक्ष्मी ग्रुप अन्तर्गतका विभिन्न अटोमोबाइल व्यवसायमा श्रेष्ठ कार्यरत छन् ।