के हो एन्ड्रोइड डिजिटल कार की ? स्मार्ट फोनबाट कसरी खुल्छ कार ? जान्नुहोस्

एन्ड्रोइड डिजिटल कार की आजको डिजिटल कार प्रविधिको उत्कृष्ट उदाहरण हो ।  सो सुविधा कार चालकका लागि अत्यन्तै उपयोगी हुनसक्छ । यसले एन्ड्रोइड स्मार्ट फोन प्रयोग गरेर कार लक गर्न, अनलक गर्न र स्टार्ट गर्न सहज बनाउछ ।

एन्ड्रोइड डिजिटल कार की भनेको एन्ड्रोइड फोनमा स्टोर गरिएको भर्चुअल कार की हो । यो भौतिक कार कीको उत्कृष्ट विकल्प हो । यसमा कारको साँचो घरमा बिर्सिए पनि आफ्नो फोनबाट सजिलै कारको ढोका खोल्न, बन्द गर्न र इग्निशन सुरु गर्न सकिन्छ । साथै घरको टिभी, एसी वा अन्य घरेलु उपकरणहरू पनि सजिलै रिमोट जस्तै उपयोग गर्न सकिन्छ ।

फोनले कार खोल्ने प्रक्रिया मुख्यतया नियर फिल्ड कम्युनिकेसन (एनएफसी) र अल्ट्रा-वाइडब्यान्ड (यूडब्ल्युबी) गरी दुई प्रविधिमा आधारित छ । एनएफसी प्रविधि छोटो दूरीमा काम गर्छ। फोनलाई कारको ढोकाको ह्यान्डल वा विशेष क्षेत्रमा ट्याप गर्दा कार अनलक हुन्छ र कारलाई स्टार्ट गर्नका लागि कारको इग्निशन सिस्टममा भएको रिडरको अगाडि फोन स्वाइप गर्नु पर्छ।

यूडब्ल्युबी प्रविधि अलि उन्नत हो र एनएफसी भन्दा लामो दूरीबाट काम गर्छ। साथै यसले प्यासिभ इन्ट्रिमा पनि समर्थन गर्छ, जसको अर्थ तपाईंले फोन खल्तीबाट निकाल्नु पनि पर्दैन । तपाईं कारको नजिक पुगेपछि कार स्वतः अनलक हुन्छ, भित्र पस्दा स्टार्ट हुन्छ र बाहिर निस्कँदा पुनः लक हुन्छ।

सुरक्षाको दृष्टिले कारको साँचो एक्सेस गर्नका लागि बायोमेट्रिक भेरिफिकेशन वा पिन आवश्यक पर्न सक्छ, जसले कारको चोरी हुनबाट जोगाउँछ ।  डिजिटल कार कीको सबैभन्दा ठूलो फाइदा भनेको तपाईंले भौतिक साँचो बोक्न नपर्ने हो। साथै यो की परिवारका सदस्य वा साथीहरूसँग पनि साझा गर्न सकिन्छ । यदि फोन हरायो भने, टाढाबाट पनि डिजिटल की निष्क्रिय गर्न सकिन्छ, जसले सुरक्षा अझ बलियो बनाउँछ।