पटक पटक बढेको मूल्यमा फेरि पनि बढ्यो बजाज मोटरसाइकलको मूल्य : ४ हजार देखि १६ हजार सम्म

काठमाडौं – पटक पटक बढिरहेको बजाज मोटरसाइकलको मूल्य फेरि बढेको छ । नेपालका लागि बजाजको आधिकारिक वितरक हंसराज हुलासचन्द एन्ड कम्पनीले आज देखि लागू हुने गरी मोटरसाइकलको मूल्यमा वृद्धि गरेको हो ।

नेपाली बजारमा उपलब्ध अधिकांश मोटरसाइकलको मूल्यमा वृद्धि गरिएको छ । यस अनुसार सबैभन्दा कम मूल्यको मोटरसाइकल प्लाटिना १००ईएसको मूल्यमा ४ हजार रुपैयाँले वृद्धि गरिएको छ । यसको मूल्य पहिले १ लाख ८५ हजार ९ सय भएकोमा अब १ लाख ८९ हजार ९ सय रुपैयाँ पुगेको छ ।

डिस्कभर १२५ डिस्क, डिस्कभर १२५ एसटी र एभेन्जर क्रुज २२० को मूल्यमा ५ हजार रुपैयाँले वृद्धि भएको छ । अब यी मोटरसाइकलको मूल्य क्रमशः २ लाख १४ हजार ९ सय, २ लाख २५ हजार ९ सय र ३ लाख ६४ हजार ९ सय रुपैयाँ पुगेको छ ।

पल्सर १२५ डिस्क, पल्सर १५० टीडी र पल्सर २०० एनएस एफआई एबीएस प्रत्येकको मूल्यमा ६ हजार रुपैयाँले वृद्धि गरिएको छ । यी मोटरसाइकलको मूल्य क्रमशः २ लाख ४४ हजार ९ सय, २ लाख ८९ हजार ९ सय र ३ लाख ८७ हजार ९ सय रुपैयाँ पुगेको छ ।

एभेन्जर १६० स्ट्रिट एबीएस, पल्सर १६० एनएस टीडी एबीएस र पल्सर २२०एफ एबीएसको मूल्यमा ७ हजार रुपैयाँले वृद्धि भएको छ । यी मोटरसाइकलको मूल्य क्रमशः ३ लाख ४३ हजार ९ सय, ३ लाख १५ हजार ९ सय र ३ लाख ५९ हजार ९ सय रुपैयाँ पुगेको छ । पल्सर १५० एसडीको मूल्यमा ८ हजार रुपैयाँले वृद्धि भई २ लाख ७४ हजार ९ सय रुपैयाँ पुगेको छ ।

बजाजले धेरै रकमको मूल्य वृद्धि गर्दै आएको डोमिनार सिरिजको मूल्य अहिले पनि बढाएको छ । डोमिनार २५० को मूल्यमा ११ हजार र डोमिनार ४०० को मूल्यमा १६ हजार रुपैयाँले वृद्धि गरिएको छ । अब यी दुई मोडलको मूल्य क्रमशः ५ लाख १८ हजार ९ सय र ५ लाख ९८ हजार ९ सय रुपैयाँ पुगेको छ ।

बजाज मोटरसाइकलका सबै मोडलको मूल्य र फिचर यहाँ हेर्न सकिन्छ ।