क्याटलको नयाँ ब्याट्रीले २ हजार किलोमिटर रेन्ज दिने चर्चा

काठमाडौं–चिनियाँ ब्याट्री निर्माता कम्पनी क्याटल(सीएटीएल) ले विद्युतीय सवारीसाधनमा २ हजार किलोमिटरसम्म रेन्ज दिन सक्ने नयाँ प्रविधिको ब्याट्रीमाथि अनुसन्धान गरिरहेको छ ।

कम्पनीले ‘लिथियम–एयर’ अर्थात् हावाबाट अक्सिजन लिने ब्याट्री प्रविधिलाई दीर्घकालीन अनुसन्धानको विषय बनाएको हो ।

यस प्रविधिमा ब्याट्रीले बाहिरी वातावरणबाट अक्सिजन लिएर रासायनिक प्रतिक्रिया गराउँदै विद्युत् ऊर्जा उत्पादन गर्छ ।

परम्परागत लिथियम–आयन ब्याट्रीमा आवश्यक सक्रिय पदार्थ ब्याट्रीभित्रै राख्नुपर्ने भए पनि लिथियम–एयर प्रविधिमा बाहिरी हावाको अक्सिजन प्रयोग हुने भएकाले उच्च ऊर्जा घनत्व हासिल गर्न सकिने सम्भावना छ ।

यस ब्याट्रीको ऊर्जा घनत्व करिब ३ हजार ५०५ वाट आवर प्रतिकिलोग्राम रहेको बताइएको छ । यो ऊर्जा घनत्व हालका धेरै ब्याट्री प्रविधिको तुलनामा निकै उच्च हो ।

यही सम्भावनाका आधारमा भविष्यमा यस्तो ब्याट्री प्रयोग गर्ने ईभीले एकपटकको चार्जमा २ हजार किलोमिटरसम्म यात्रा गर्न सक्ने अनुमान गरिएको छ ।

तर, यो प्रविधि अहिले अनुसन्धानकै चरणमा छ । सीएटीएलका प्रमुख वैज्ञानिक वु काईले सन् २०२६ को इक्विपमेन्ट पावरहाउस फोरममा लिथियम–एयर प्रविधिलाई दीर्घकालीन अनुसन्धानको क्षेत्रका रूपमा उल्लेख गरेका थिए ।

कम्पनीले यसको व्यावसायिक उत्पादन वा बजारमा ल्याउने समयसीमा भने सार्वजनिक गरेको छैन ।