ईभी ब्याट्रीमा नयाँ प्रतिस्पर्धा, सोडियम आयनलाई चीनको प्रोत्साहन

काठमाडौं–चीनले सोडियम आयन ब्याट्री उत्पादनलाई प्रोत्साहन गर्न कर छुट दिने नीति लागू गरेको छ ।

लिथियम आयन ब्याट्रीमा कर लगाउन थालेको चीनले सोडियम आयन, सोलिड स्टेट र फ्युल सेल ब्याट्रीलाई सन् २०२८ को अन्त्यसम्म उपभोग करबाट छुट दिने भएको हो ।

चीनको नयाँ नीतिअनुसार सन् २०२६ सेप्टेम्बर १ देखि लिथियम आयन ब्याट्रीमा २ प्रतिशत उपभोग कर लाग्न थालेको छ । सन् २०२७ सेप्टेम्बर १ देखि उक्त कर बढेर ४ प्रतिशत पुग्नेछ । तर, सोडियम आयन ब्याट्रीले सन् २०२८ डिसेम्बर ३१ सम्म कर छुट पाउनेछन् । यस्तो छुटका लागि सम्बन्धित ब्याट्रीले राष्ट्रिय मापदण्ड पूरा गरेको हुनुपर्नेछ ।

यसैबीच, चिनियाँ ब्याट्री निर्माता हाइनाले वुहानमा वार्षिक १० गिगावाट आवर क्षमताको सोडियम आयन ब्याट्री उत्पादन उद्योग स्थापना गर्ने योजना बनाएको छ ।

परियोजनाको पहिलो चरणमा ३ गिगावाट आवर क्षमताको उद्योग निर्माण हुनेछ । सन् २०२७ को सुरुवातमा निर्माण थालेर सोही वर्षको अन्त्यसम्म उत्पादन सुरु गर्ने लक्ष्य राखिएको छ ।

कम्पनीले चेङ्ली स्पेसल अटोमोबाइल ग्रुपसँग सहकार्य गरी सोडियम आयन ब्याट्रीबाट चल्ने फोहोर संकलन गर्ने ट्रक, पानी छर्कने ट्रक तथा अन्य विद्युतीय विशेष प्रयोजनका सवारीसाधन विकास गर्ने योजना पनि बनाएको छ ।

सोडियम आयन ब्याट्रीमा लिथियमको तुलनामा कच्चा पदार्थ सहज रूपमा उपलब्ध हुने भएपनि यसको ऊर्जा घनत्व तुलनात्मक रूपमा कम हुनु र उत्पादन लागत प्रतिस्पर्धी बनाउनु अझै चुनौतीपूर्ण रहेको छ ।