टायरबाटै चार्ज हुने अनौठो वायरलेस चार्जिङ सिस्टमको विकास

स्विट्जरल्यान्डको कम्पनी विन्डक्सनले इलेक्ट्रिक बस चार्ज गर्नको लागि नयाँ र अनौठो रोड-टु-भेइकल चार्जिङ प्रविधि विकास गरेको छ। सो प्रविधिमा बसको पाङ्ग्राहरू मार्फत सडकमा जडान गरिएका चार्जिङ प्याडबाट सिधै ब्याट्रीमा पावर स्थानान्तरण गरिन्छ। यसले बसको ब्याट्री छुट्टै चार्ज गर्नुपर्ने आवश्यकता कम हुनेछ र बस स्टपमै रोकिएका बेला पनि अटोमेटिक ब्याट्री चार्ज गर्न सकिनेछ ।

सामान्य वायरलेस चार्जिङ सिस्टममा सडक वा जमिनमुनि राखिएको कोइल र गाडीको तल्लो भागमा जडान गरिएको रिसिभिङ कोइलबीच केही दूरी हुन्छ। यस्तो दूरीले ऊर्जा स्थानान्तरणको दक्षतामा असर पार्न सक्छ। विन्डक्सनको अवधारणामा भने बसका विशेष टायरभित्र चार्जिङ कोइल जडान गर्ने योजना छ। यसले सडक र पाङ्ग्राबीचको दूरीलाई उपयोग गर्दै ऊर्जा स्थानान्तरणलाई थप प्रभावकारी बनाउने लक्ष्य राखेको छ।

सो सिस्टममा सडकमा जडान गरिएका कोइलले चुम्बकीय क्षेत्र सिर्जना गर्नेछ। टायरभित्र रहेका सम्बन्धित कोइलले उक्त ऊर्जालाई ग्रहण गरी इलेक्ट्रिक सिस्टममार्फत बसको ब्याट्रीसम्म पुर्‍याउने अवधारणा प्रस्तुत गरिएको छ। यद्यपि, सो प्रविधि व्यावहारिक रूपमा कसरी सञ्चालन हुनेछ र विभिन्न सडक तथा मौसममा यसको कार्यक्षमता कस्तो रहनेछ भन्ने विषय परीक्षणबाट स्पष्ट हुनेछ।

इलेक्ट्रिक बसलाई रातभरि डिपोमा राखेर एकैपटक चार्ज गर्नुको सट्टा दिनभरि विभिन्न समयमा चार्ज गर्न सकिएमा इलेक्ट्रिक खपतलाई व्यवस्थित गर्न सहयोग पुग्न सक्छ। विशेषगरी, दिउँसो सौर्य ऊर्जाको उत्पादन बढी हुने समयमा चार्जिङ गर्न सकिएमा नवीकरणीय ऊर्जाको उपयोग बढाउने अवसर पनि प्राप्त हुन सक्छ।

विन्डक्सनले स्विट्जरल्यान्डको विन्टरथरमा सो प्रविधिको परीक्षण गरिरहेको छ। कम्पनीको योजनाअनुसार, सन् २०२८ सम्ममा यात्रुसहितको पहिलो पाइलट सञ्चालन सुरु गर्ने लक्ष्य राखिएको छ।