केन्द्रको प्रणालीमा ड्राइभिङ लाइसेन्सको डाटा जाने र छपाइ हुने, भयो सम्झौता

काठमाडौं – सवारी चालक अनुमतिपत्र (लाइसेन्स) वितरणलाई थप व्यवस्थित र सहज बनाउन यातायात व्यवस्था विभाग, हुलाक सेवा विभाग र सुरक्षण मुद्रण केन्द्रबीच मंगलबार पूर्वाधार विकास मन्त्रालयमा त्रिपक्षीय सम्झौता भएको छ।

सम्झौताअनुसार यातायात व्यवस्था विभागबाट सञ्चालनमा रहेको विद्युतीय ड्राइभिङ लाइसेन्स तथा सवारी दर्ता प्रणाली (ईडीएलभीआरएस) मार्फत जारी हुने लाइसेन्सको डाटा सोझै सुरक्षण मुद्रण केन्द्रको प्रणालीमा जाने र त्यहीबाट लाइसेन्स छपाइ हुने व्यवस्था गरिएको छ।

ईडीएलभीआरएस प्रणालीबाट जारी भएका लाइसेन्स सम्बन्धित प्रदेश कार्यालयमा वितरण गर्ने वा सेवाग्राहीले इच्छाएको ठेगानामा पु¥याउने कार्यलाई व्यवस्थित गर्न यो सम्झौता महत्वपूर्ण हुनेछ।

हुलाक सेवा विभागमार्फत लाइसेन्स सेवाग्राहीको घरैमा पु¥याउने व्यवस्था गर्ने सरकारी योजना पहिले देखि नै कार्यान्वयमा आएको थियो । अब यो व्यवस्थाले वितरण कार्य अझै प्रभावकारी हुने अपेक्षा गरिएको छ ।