चांगान निभो क्यू०५ लगातार पाँचौँ महिना पनि चीनमा एसयूभी सेग्मेन्ट लिडर, नेपालमा पनि डेलिभरी सुरु हुँदै

चांगान निभो क्यू०५ ले चीनमा आफ्नो बलियो बजार प्रदर्शनलाई निरन्तरता दिँदै सन् २०२६ को अगस्टमा पनि देशको सर्वाधिक बिक्री हुने कम्प्याक्ट एसयूभीको स्थान हासिल गरेको छ। यससँगै क्यू०५ लगातार पाँच महिनादेखि आफ्नो सेग्मेन्टको शीर्षस्थानमा रहन सफल भएको छ।

निभो क्यू०५ केही साताअघि मात्रै नेपालमा सार्वजनिक गरिएको हो। यसले नाडा अटो शोमा ठूलो संख्यामा बुकिङ प्राप्त गर्दै नेपाली ग्राहकबाट उत्साहजनक प्रतिक्रिया पाएको थियो। अब यसको डेलिभरी पनि केही दिनभित्र सुरु हुँदैछ।

चीनको पछिल्लो खुद्रा बिक्री तथ्यांकअनुसार अगस्टमा क्यू०५ का १७ हजार ३४९ युनिट बिक्री भएका छन्। यो नतिजाले अप्रिलदेखि अगस्ट २०२६ सम्म कम्प्याक्ट एसयूभी सेग्मेन्टमा क्यू०५ को नेतृत्वलाई निरन्तरता दिएको छ। विश्वकै सबैभन्दा ठूलो र प्रतिस्पर्धात्मक अटोमोबाइल बजारमध्ये एक चीनमा निरन्तर बलियो माग कायम राख्नु क्यू०५ को महत्त्वपूर्ण उपलब्धि हो।

क्यू०५ पहिलोपटक अप्रिलमा १५ हजार ८१४ युनिट बिक्रीसहित सेग्मेन्टको शीर्षस्थानमा पुगेको थियो। मेमा १५ हजार ९५४ युनिट बिक्री गर्दै यसले आफ्नो नेतृत्व कायम राख्यो। जुनमा बिक्री बढेर १८ हजार ९०८ युनिट पुग्यो भने जुलाईमा १८ हजार ८७१ युनिट बिक्री भयो। अगस्टमा पनि क्यू०५ ले १७ हजार ३४९ युनिटको बलियो नतिजा हासिल गर्‍यो। यी पाँच महिनामा मात्रै क्यू०५ का कुल ८६ हजार ८९६ युनिट खुद्रा बिक्री भएका छन्।

स्थापित प्रतिस्पर्धीभन्दा अगाडि

अगस्टको बिक्री सूचीमा क्यू०५ ले चिनियाँ तथा अन्तर्राष्ट्रिय बजारका स्थापित प्रतिस्पर्धीलाई पछाडि पारेको छ। टोयोटा कोरोला क्रस १४ हजार ६७५ युनिटसहित दोस्रो स्थानमा रह्यो। चीनमा जिली बोयुए एल तथा अन्तर्राष्ट्रिय बजारमा जिली स्टार्रे नामले चिनिने मोडलले १४ हजार ३०२ युनिट बिक्री गर्‍यो। टोयोटा आरएभी४ को बिक्री १४ हजार ६२ युनिट रह्यो।

त्यसैगरी, विभिन्न अन्तर्राष्ट्रिय बजारमा बीवाईडी सिलायन ५ का रूपमा बिक्री हुने बीवाईडी सङ प्रो न्यू इनर्जीले १३ हजार ९५४ युनिट बिक्री गर्‍यो। चीनमा जिली सिङयुए एल र अन्तर्राष्ट्रिय बजारमा जिली मोन्जारो नामले चिनिने मोडलले १३ हजार २८७ युनिट बिक्री गरेको छ। यसरी अगस्टमा क्यू०५ ले आफ्नो निकटतम प्रतिस्पर्धीलाई २ हजार ६७४ युनिटले पछाडि पारेको छ।

जुलाईको तुलनामा अगस्टमा क्यू०५ को बिक्री केही कम भए पनि यो आफ्ना प्रमुख प्रतिस्पर्धीभन्दा स्पष्ट रूपमा अगाडि रह्यो। लगातार पाँच महिनासम्म मासिक बिक्री १५ हजार युनिटभन्दा माथि कायम रहनुले यसको सफलता सुरुवाती उत्साह वा छोटो अवधिको प्रचारमा मात्र सीमित नरहेको देखाउँछ।

लोकप्रियता बढ्नुका प्रमुख कारण

क्यू०५ को लोकप्रियताको मुख्य कारण स्पेस, कम्फर्ट, प्रविधि र मूल्यको बलियो संयोजन हो। यसको २,७३५ एमएम ह्विलबेसले फराकिलो क्याबिन उपलब्ध गराउँछ। ढल्काउन मिल्ने पछाडिका सिट, व्यावहारिक लगेज क्षमता, नौ तहको सिट निर्माण र धेरैवटा स्टोरेज स्पेसले यसलाई परिवारका लागि उपयोगी बनाउँछन्।

सीएटीएल ब्याट्री सेल र ३सी फास्ट चार्जिङ प्रविधिले उपयुक्त अवस्थामा ब्याट्रीलाई करिब १५ मिनेटमा ३० देखि ८० प्रतिशतसम्म चार्ज गर्न सक्छ। आधुनिक डिजाइन, एरोडाइनामिक प्रोफाइल, स्मार्ट फिचर र प्रिमियम देखिने इन्टेरियरले पनि युवा तथा प्रविधिप्रेमी ग्राहकमाझ यसको आकर्षण बढाएको छ।

चीनको कम्प्याक्ट एसयूभी सेग्मेन्टमा लगातार पाँच महिनाको नेतृत्वले चांगान निभो क्यू०५ लाई बलियो बजार मान्यता प्रदान गरेको छ। यसको निरन्तर सफलताले ग्राहकहरूले पहुँचयोग्य मूल्यभित्रै कम्फर्ट, डिजाइन र टेक्नोलोजीमा ‘अ क्लास अबभ’ अनुभव दिने ईभीलाई प्राथमिकता दिन थालेको देखाउँछ।