ईभी आयातको नयाँ गन्तव्य बन्दै कोरला नाका, साउनमा भित्रिए १०० युनिट

काठमाडौं–नेपालमा विद्युतीय सवारी साधन (ईभी) को प्रयोग तीव्र गतिमा बढिरहेका बेला मुस्ताङस्थित नेपाल–चीन उत्तरी सीमा नाका कोरला यसको आयातका लागि एक नयाँ र रणनीतिक विकल्पका रूपमा उदाएको छ । परम्परागत नाकाहरूमा हुने चाप र भौगोलिक चुनौतीहरूका बीच कोरला नाका प्रयोग गरी चीनबाट सीधै गाडीहरू भित्र्याउन सहज भएपछि व्यवसायीहरू यसतर्फ आकर्षित बनेका छन् ।

चालु आर्थिक वर्षको पहिलो महिना साउनमा मात्रै कोरला नाका हुँदै १०० वटा विद्युतीय गाडी नेपाल भित्रिएका छन् । मुस्ताङ भन्सार कार्यालयका प्रमुख विदुर चुडालका अनुसार हाल यस नाकाबाट दैनिक औसत १० वटा कन्टेनरको भन्सार जाँचपास भइरहेको छ, जसले नाकाको बढ्दो व्यावसायिक सक्रियतालाई दर्शाउँछ ।

सवारी साधन तथा अन्य व्यापारिक सामग्रीको नियमित आयातबाट राज्यकोषमा समेत उल्लेख्य योगदान पुग्न थालेको छ । साउन महिनाको यसै अवधिमा भन्सार कार्यालयले २९ करोड राजस्व संकलन गरेको जनाइएको छ ।

कोरला नाकालाई विद्युतीय गाडी आयातको नयाँ र भरपर्दो मार्गका रूपमा विकास गर्ने क्रम गत आर्थिक वर्षदेखि नै सुरु भएको हो । गत आवमा मात्रै यही बाटो भएर ३ हजारभन्दा बढि ईभी भित्रिएका थिए, जसबाट ६ अर्ब ९२ करोड राजस्व उठेको थियो ।

यसले आगामी दिनमा पनि उत्तरी नाका कोरला चीनसँगको व्यापार र खासगरी ईभी आयातका लागि थप प्रभावकारी बन्दै जाने संकेत गरेको छ ।