‘रेड डट डिजाइन अवार्ड’ विजेता चेरी क्यू नेपाल आउँदै, नाइमा मोबिलिटी एक्स्पोमा सार्वजनिक हुने

काठमाडौं– चेरी कारको नेपालका लागि आधिकारिक वितरक पायोनियर मोटो कर्पले विश्वप्रसिद्ध ‘रेड डट डिजाइन अवार्ड २०२५’ र आईएफ डिजाइन अवार्ड २०२६ प्राप्त गर्न सफल चेरी क्यूलाई नेपाली बजारमा भित्र्याउने घोषणा गरेको छ ।

शतप्रतिशत विद्युतीय यो अर्बन क्रसओभर आगामी नाइमा मोबिलिटी एक्सपो २०२६ मार्फत नेपालमा पहिलो पटक सार्वजनिक हुने जनाइएको छ ।

नेपाली अटो प्रेमी तथा ग्राहकहरूले यही ११ देखि १६ अगस्ट २०२६ सम्म भृकुटीमण्डप, काठमाडौं मा आयोजना हुने उक्त एक्स्पोमा यस अन्तर्राष्ट्रिय पुरस्कार विजेता गाडीलाई प्रत्यक्ष रूपमा अवलोकन गर्न सक्नेछन् ।

विश्वकै प्रतिष्ठित डिजाइन अवार्डबाट सम्मानित
विश्वकै प्रतिष्ठित डिजाइन सम्मानहरूमध्ये पर्ने ’रेड डट डिजाइन अवार्ड २०२५’ र ’आइएफ डिजाइन अवार्ड २०२६’ बाट चेरी क्यू सम्मानित भइसकेको छ । अन्तर्राष्ट्रिय डिजाइन विज्ञहरूको निर्णायक मण्डलले यस कारको आकर्षक लुक्स, नवीन सोच, सौन्दर्य र उपयोगिताबीचको उत्कृष्ट संयोजनलाई मध्यनजर गर्दै यो अवार्ड प्रदान गरेको हो ।

यस गाडीले आधुनिक शहरी विद्युतीय सवारीको नयाँ परिकल्पना प्रस्तुत गर्दै भविष्यमुखी डिजाइन र स्मार्ट इन्जिनियरिङको बेजोड नमुना प्रस्तुत गर्दछ ।

प्रिमियम इन्टेरियर र भविष्यमुखी फिचर्स
शहरी जीवनशैलीलाई ध्यानमा राखेर निर्माण गरिएको चेरी क्यूमा आधुनिक र लक्जरी सुविधाहरू समावेश गरिएका छन् । प्रिमियम इन्टेरियर र सफा तथा आकर्षक बाह्य डिजाइनमा तयार पारिएको यस कारमा आकर्षक र युनिक लाइटिङ सिस्टम उपलब्ध गराइएको छ, जसले गाडीलाई प्रिमियम लुक्स दिन्छ ।

दैनिक यात्रालाई आरामदायी बनाउन पर्याप्त स्पेस र फराकिलो क्याबिन उपलब्ध यस कारमा ४१.२ किलोवाट आवरको ब्याट्री प्याक र ९० किलोवाट क्षमताको मोटर जडान गरिएको छ । उक्त ब्याट्रीलाई एकपटक फुल चार्ज गर्दा ४०० किलोमिटर रेन्ज प्रदान गर्न दाबी गरिएको छ ।
यस क्रसओभरलाई चेरीले चालकलाई उत्कृष्ट ड्राइभिङ अनुभव प्रदान गर्ने रियर ह्विल ड्राइभ प्लेटफर्ममा तयार पारेको हो ।

आधुनिक डिजाइन, अन्तर्राष्ट्रिय स्तरमा प्रमाणित गुणस्तर र अत्याधुनिक ईभी प्रविधिको संयोजन भएको चेरी क्यूले नेपालको तीव्र गतिमा बढिरहेको विद्युतीय सवारी साधनको बजारमा नयाँ मापदण्ड स्थापित गर्ने कम्पनीले विश्वास लिएको छ ।