सर्भो लुब्रिकेन्टको नेपालमा उत्पादन सुरु

काठमाडौं–नेपाली बजारमा सर्बाधिक खपत हुने लुब्रिकेन्ट ब्रान्ड सर्भो स्वदेशमै उत्पादन सुरु भएको छ । गोल्छा ग्रुप र भारतको सरकारी स्वामित्वमा रहेको इन्डियन आयल कर्पोरेशन (आईओसी) बीचको साझेदारीमा स्थापित सर्भो लुब्रिकेन्ट उत्पादन केन्द्रले नवलपुरमा व्यावसायिक उत्पादन सुरू गरेको हो ।

नेपाली औद्योगिक इतिहासमा यो एउटा उल्लेखनीय उपलब्धि मानिएको छ । उद्योगमा ५० करोड रूपैयाँ लगानी गरिएको छ । उद्योगबाट अटोमोटिभ र इन्डष्ट्रियल दुबै प्रयोजनका लुब्रिकेन्ट उत्पादन हुने जनाइएको छ ।

गोल्छा ग्रुप अन्तर्गतको हंसराज हुलासचन्द एन्ड कम्पनीले यसअघि नेपालमै बजाज मोटरसाइकलको प्लान्ट सञ्चालनमा ल्याइसकेको छ । उक्त प्लान्टबाट बजाजका प्राय सबैजसो मोडल एसेम्वल हुने गरेका छन् । मेड इन नेपाल अभियानमा कम्पनीको यो बजाज पछिको दोस्रो पहलकदमी हो ।

सर्भो लुब्रिकेन्टको सो प्लान्टबाट १ सय ५० जनाले रोजगारी पाउने बताइएको छ । कम्पनीले यसअघि भारतबाट लुब्रिकेन्ट आयात गरी बिक्री वितरण गर्दै आएको थियो ।