हुन्डाई र टीभीएसको साझेदारीले पायो औपचारिकता, इलेक्ट्रिक थ्री ह्विलर निर्माण गर्ने

हुन्डाई मोटर कर्पोरेसन र टीभीएस मोटर कम्पनीले लास्ट माइल कनेक्टिभिटीको लागि इलेक्ट्रिक थ्री ह्विलर विकास गर्ने सम्झौतामा हस्ताक्षर गरेका छन् ।

सम्झौता अन्तर्गत, हुन्डाईले आफ्नो अनुसन्धान र विकास, उन्नत मोबिलिटी प्रविधि र डिजाइनमार्फत इलेक्ट्रिक थ्री ह्विलर डिजाइनको नेतृत्व गर्नेछ ।

टीभीएसले आफ्नो विद्युतीय प्लेटफर्म, व्यापक थ्री ह्विलर इन्जिनियरिङ विशेषज्ञता र स्थानीय बजार ज्ञान प्रयोग गरेर उत्पादनको सह–विकास गर्नेछ । टीभीएसले स्थानीय बिक्रीको पनि नेतृत्व गर्ने सम्झौतामा उल्लेख गरिएको छ । दुई कम्पनीको सहकार्यले भारतीय बजारको माग र भविष्यको निर्यातलाई पूरा गर्ने विश्वास लिइएको छ ।

इलेक्ट्रिक थ्री ह्विलरका लागि आवश्यक कम्पोनेन्टहरू स्थानीय रूपमा उत्पादन गरिने सम्झौतामा उल्लेख गरिएको छ । नयाँ साझोदारीले भारतको अटोमोटिभ आपूर्ति शृङ्खलालाई बलियो बनाउनुको साथै रोजगारीका अवसरहरू सिर्जना गर्न र लागत घटाउन तथा स्पेयर पाट्र्सको उपलब्धता सुनिश्चित गर्न पनि मद्दत गर्ने अपेक्षा गरिएको छ ।

यी दुई कम्पनीको साझेदारीमा विकास गरिएको पहिलो इलेक्ट्रिक थ्री ह्विलर ई३डब्लूको कन्सेप्टलार्ई भारत मोबिलिटी ग्लोबल एक्सपो २०२५ मा सार्वजनिक गरिएको थियो ।