शाओमीको एसयू७ ले ल्यायाे इलेक्ट्रिक कार बजारमा हलचल, ३ सेकेन्डमै १०० किमीको गति

शाओमीले आफ्नो बहुप्रतिक्षित इलेक्ट्रिक कार शाओमी एसयू७ को नयाँ अपडेट संस्करण लन्च गरेको छ । स्मार्टफोन क्षेत्रमा स्थापित पहिचान बनाइसकेको कम्पनीले अब अटोमोबाइल क्षेत्रमा पनि बलियो उपस्थितिको संकेत दिएको छ। नयाँ एसयू७ पहिलेभन्दा बढी सुरक्षित, हाई टेक र पावरफुल बनेको छ ।

सो सेडान सेगमेन्टको कारले एक पटक चार्जमा ९०२ किलोमिटरसम्मको दूरी तय गर्न सक्ने दाबी गरिएको छ । यसको ब्याट्रीमार्फत केवल १५ मिनेटको चार्जमा ६७० किलोमिटरको रेन्ज प्राप्त गर्न सकिन्छ भने १० प्रतिशतबाट ८० प्रतिशतसम्म चार्ज हुन मात्र १२ मिनेट लाग्ने बताइएको छ । सो कारले ० देखि १०० किलोमिटर प्रतिघण्टा गति केवल ३.०८ सेकेन्डमै हासिल गर्न सक्छ र टप स्पिड २६५ किलोमिटर प्रतिघण्टा पुग्छ ।

एसयू७ मा स्न्यापड्रागन ८ जेन ३ चिप प्रयोग गरिएको छ भने अटोमेटिक ड्राइभिङका लागि एन-भिडिया ड्राइभ ए-जी-एक्स थोर चिप जडान गरिएको छ । यसको स्मार्ट क्याबिनमा ६ वटा स्क्रिनहरू छन् । शाओमीको हाइपरओएस सिस्टमले घरका स्मार्ट उपकरणहरू कारबाटै नियन्त्रण गर्न सकिन्छ । साथै, एआई भ्वाइस असिस्ट सिस्टम पहिलेभन्दा अझै उत्कृष्ट भएको छ ।

सो कार ५ मिटर लामो लक्जरी सेडान कार हो र यो ९ फरक रङमा उपलब्ध छ । सेफ्टीका लागि यसमा ९ वटा एयरब्याग राखिएको छ । साथै, ब्याट्री सिस्टमलाई दुर्घटनाको अवस्थामा आगलागी रोक्ने गरी डिजाइन गरिएको छ । भिजेको सडकमा सुरक्षित ड्राइभिङका लागि एआईले स्वतः सडकको अवस्था पहिचान गरी गाडीको पकड समायोजन गर्ने सुविधा पनि समावेश गरिएको छ।

एसयू७ तीन भेरिएन्टमा उपलब्ध छ जसको सुरुआती मूल्य करिब ३० लाख भारुबाट सुरु भई उच्च भेरिएन्टमा करिब ४१ लाख भारुसम्म पुग्छ । नयाँ एसयू७ ले टेस्ला कारसँग प्रतिस्पर्धा गर्नेछ ।