यामाहालाई उछिन्दै टीभीएस बन्यो विश्वको तेस्रो ठूलो टु–ह्विलर ब्रान्ड

टीभीएस मोटर कम्पनी बिक्रीका हिसाबले विश्वको तेस्रो ठूलो टु–ह्विलर निर्माता बनेको छ । पहिलोपटक यामाहालाई उछिन्दै टीभीएसले यस्तो उपलब्धी हाँसिल गरेको हो ।

टीभएसले २०२५ मा विश्वभर ५४ लाख ६० हजार मोटरसाइकल र स्कुटर बिक्री गरेको छ । जुन अघिल्लो वर्ष बिक्री गरेको ४५ लाख २० हजारको तुलनामा निकै धेरै हो ।

त्यसैगरी, यामाहाले सोही अवधिमा ५० लाख युनिट बेचेको छ, जुन अघिल्लो वर्षको तुलनामा ०.८ प्रतिशतले सामान्य वृद्धि हो । होन्डा विश्वव्यापी टु–ह्विलर सेग्मेन्टमा निर्विवाद लिडरको रूपमा शीर्ष स्थानमा रहन सफल भएको छ ।

जापानी ब्रान्डले २०२५ मा १ करोड ६४ लाख युनिट मोटरसाइकल तथा स्कुटर बिक्री गरेको जनाइएको छ । अघिल्लो वर्ष होन्डाले कुल १ करोड ५५ लाख युनिट बिक्री गरेको थियो ।

दोस्रो स्थानमा रहेको हिरो मोटोकर्पले गत वर्ष ६२ लाख ५० हजार युनिट बिक्री गरेको छ, जुन तेस्रो स्थानमा रहेको टीभीएस भन्दा धेरै अगाडि छ । टीभीएस भारत र नेपाली बजारमा तेस्रो ठूलो ब्रान्ड पनि हो ।

भारतमा टीभीएसको बजार हिस्सा २० प्रतिशत हाराहारी छ । कम्पनी इलेक्ट्रिक टु–ह्विलरको मासिक बिक्री चार्टमा निरन्तर शीर्ष स्थानमा रहँदै एक प्रमुख खेलाडीको रूपमा देखा परेको छ । टीभीएसले हाल युरोप, अफ्रिका, ल्याटिन अमेरिका, दक्षिणपूर्व एशिया र मध्य पूर्वमा आफ्नो बजार विस्तार गर्दै लगेको छ ।