नयाँ टाटा पन्चको कठोर परीक्षण, गहिरो पानीदेखि ठाडो उकालोसम्म

टाटा मोटर्सले हालै पेश गरिएको नयाँ टाटा पन्चलाई अत्यन्तै कठोर परीक्षणमा उतारेको छ, जहाँ यसले गहिरो पानी पार गर्नेदेखि ठाडो उकालो र अवतरणसम्मका चुनौतीहरू सहजै पार गराएको छ ।

नयाँ टाटा पन्चमा १९३ एमएमको ग्राउन्ड क्लियरेन्स दिइएको छ, जुन यसको सेग्मेन्टमै उत्कृष्ट मानिन्छ। यसको उच्च ग्राउन्ड क्लियरेन्स र बलियो च्यासिसले ठूला ढुङ्गा, गहिरा खाल्डा र खराब सडकमा पनि गाडीलाई सुरक्षित रूपमा ड्राइभ गर्न सकिन्छ ।

अफरोड क्षमतामा थप बल दिनका लागि नयाँ पन्च फेसलिफ्टको एएमटी भेरिएन्टमा ट्र्याक्सन प्रो मोड दिइएको छ। यो मोड विशेषगरी चिप्लो, हिलो वा कच्चा सडकमा निकै उपयोगी हुन्छ। यदि गाडीको एउटा पाङ्ग्रा हिलोमा अड्किन्छ भने यो सिस्टमले अर्को पाङ्ग्रामा पावर पठाएर गाडीलाई सजिलै बाहिर निकाल्न सहयोग गर्छ। यसका साथै, नयाँ पन्चले अब ३५० एमएम गहिरो पानीमा पनि सहजै यात्रा गर्न सक्छ ।

कम्पनीले सार्वजनिक गरेको भिडियोमा पन्चलाई निकै ठाडो उकालो चढ्दै र त्यसपछि लगभग ९० डिग्री जत्तिकै ठाडो अवतरण सुरक्षित रूपमा गर्दै गरेको देखिन्छ। यसमा २०.३ डिग्रीको एप्रोच एंगल, ३७.६ डिग्रीको डिपार्चर एंगल र २२.२ डिग्रीको र्याम्प-ओभर एंगल समावेश गरिएको छ ।

नयाँ टाटा पन्चमा १.२ लिटरको टर्बोचार्ज्ड पेट्रोल इन्जिन प्रयोग गरिएको छ, जसले १२० पीएस पावर र १७० एनएम टर्क उत्पादन गर्छ। अघिल्लो मोडलको तुलनामा यो पावर आउटपुट उल्लेखनीय रूपमा बढाइएको छ। सस्पेन्सन सिस्टममा पनि सुधार गरिएको छ, जसका कारण खराब सडकमा यात्रा गर्दा क्याबिनभित्र कम्पन र आवाज कम महसुस हुन्छ।