अब नेपालमै बनेको विद्युतीय स्कुटर नेपाली बजारमा ल्याउने तयारीमा यात्री, रोड टेस्टिङ चल्दै

काठमाडौं – नेपालमै बनेको विद्युतीय मोटरसाइकल ल्याएर चर्चा कमाएको कम्पनी यात्रीले अब नेपालमै बनेको विद्युतीय स्कुटर समेत बजारमा ल्याउने तयारीलाई अन्तिम चरणमा पु-याएको छ । करिव डेढ वर्ष पहिले यात्री मोटरसाइकल्स र सिप्रदी ट्रेडिङ प्रालि मिलेर बनाएको नयाँ कम्पनीमार्फत सो स्कुटर बजारमा आउने भएको हो ।

हाल सो स्कुटरको रोड टेस्टिङ अर्थात सडक परीक्षण धमाधम भइरहेको कम्पनीले जानकारी दिएको छ ।

यो अवधिमा यात्रीले विद्युतीय स्कुटरको डिजाइन, प्रोटोटाइप तयार पारेर स्कुटर उत्पादन गरी टेस्टिङ थालेको हो। एउटै विद्युतीय स्कुटर ५० हजार किलोमिटर गुडाएर परीक्षण गरेपछि त्यसको रिपोर्टका आधारमा मास उत्पादनमा जाने योजना रहेको यात्रीले जनाएको छ।

२०७६ पुसमा नेपालमै डिजाइन तथा उत्पादन भएको यात्रीको विद्युतीय मोटरसाइकल सार्वजनिक भएको थियो। डिजाइनमा अब्बल रहेको युवाको समूहले बनाएको यात्रीको विद्युतीय मोटरसाइकल विभिन्न उतारचढावबीच चलिरहेको थियो। त्यहीबीचमा यात्रीले सिप्रदीसँग सहकार्यको घोषणा गरेको थियो।

गत असार महिनातिर समेत यो स्कुटरको कार्य अगाडि बढिरहेको जानकारी यात्री मोटरसाइकल्सले दिएको थियो । यात्रीले निर्माण गरेको मोटरसाइकलको नाम पी१ थियो भने स्कुटरका लागि पी२ नाम दिइएको छ ।